Gjermania pëson disfatë historike ndaj Sllovakisë, dështim i rëndë në nisje të kualifikueseve

Kombëtarja e Gjermanisë e nisi në mënyrën më të keqe të mundshme fushatën kualifikuese për Kupën e Botës 2026, duke u mposhtur 2-0 nga Sllovakia në Bratislavë. Për skuadrën e Julian Nagelsmann ky ishte humbja e tretë radhazi, pas asaj ndaj Portugalisë (1-2) në gjysmëfinalen e Ligës së Kombeve dhe Francës (0-2) në ndeshjen për vendin e tretë.

Për vendasit, protagonistë u bënë David Hancko (42’) dhe David Strelec (55’), të cilët me golat e tyre i dhanë një fitore historike “Sokolave”.

Një seri negative rekordesh për Gjermaninë:

• Humbja e parë ndonjëherë e Gjermanisë në ndeshjen hapëse të kualifikimeve për Kupën e Botës.

• Humbja e parë si mysafir në historinë e kualifikimeve për Kupën e Botës, pas një bilanci prej 41 fitoresh dhe 10 barazimesh.

• Ndërprerja e serisë prej 42 ndeshjesh radhazi në kualifikimet për Botërorin ku Gjermania kishte shënuar të paktën një gol. Hera e fundit që nuk kishin gjetur rrjetën ishte në tetor 2001, kundër Finlandës (0-0).

• Vetëm hera e dytë që Gjermania humb një ndeshje kualifikuese të Kupës së Botës me më shumë se një gol diferencë. Rasti i fundit daton në vitin 2001, kur u mposhtën 5-1 nga Anglia.

Ky rezultat e vendos Gjermaninë në një pozitë të vështirë në Grupin A, ku bëjnë pjesë edhe Irlanda e Veriut dhe Luksemburgu. Për Sllovakinë, ndërkohë, fitorja është një hap gjigant drejt ëndrrës për t’u rikthyer në një Botëror për herë të parë që nga viti 2010.