Brian Brobbey shënoi një gol dramatik në minutën e 94-të, duke i dhënë Sunderland një barazim 2-2 ndaj kryesuesve të Premier League, Arsenal, dhe duke zgjatur serinë e tyre të pamposhtur në shtëpi në gjashtë ndeshje radhazi.
Siç pritej, rasti i parë erdhi nga një goditje standarte e Arsenalit, por gjuajtja nga distanca e Declan Rice u ndal pa vështirësi nga portieri Robin Roefs. Sunderland u përgjigj me një përpjekje të Wilson Isidor, i cili goditi jashtë nga një kënd i vështirë. Në rastin e dytë, megjithatë, vendasit ishin shumë më efikasë: Daniel Ballard, i rritur në akademinë e Arsenalit, shënoi me forcë pas një topi të ulur nga Nordi Mukiele, duke i dhënë fund serisë mbresëlënëse të “Topçinjve” prej tetë ndeshjesh pa pësuar gol. William Saliba kishte një rast të artë për të barazuar në minutat shtesë të pjesës së parë, por goditja e tij me vole fluturoi mbi traversë.
Në pjesën e dytë, Arsenal rriti intensitetin dhe rrezikshmërinë. Martín Zubimendi provoi me një gjuajtje të kthyer që u ndal nga Roefs, ndërsa Bukayo Saka gaboi fillimisht, por realizoi pak më vonë me këmbën e djathtë pas një asistimi të Mikel Merinos, duke vendosur baraspeshën. Eberechi Eze testoi sërish portierin vendas, ndërsa Zubimendi goditi traversën me një goditje të butë pas një topi të kthyer nga Roefs.
Presioni i vazhdueshëm i miqve solli edhe golin e dytë: Leandro Trossard realizoi me mjeshtëri në këndin e sipërm nga jashtë zone. Megjithatë, drama nuk kishte përfunduar – në sekondat e fundit, Brobbey u hodh më shpejt se portieri David Raya dhe realizoi me një goditje akrobatike, duke çuar në delir tifozët vendas.
Roefs u shqua sërish në fund me një pritje të jashtëzakonshme ndaj goditjes me kokë të Riccardo Calafiorit, ndërsa Ballard bllokoi përpjekjen e dytë të Merinos, duke siguruar një pikë të madhe për Sunderland.
Pavarësisht zhgënjimit, Arsenal zgjat në 16 ndeshje serinë pa humbje ndaj Sunderland në Premier League, por humbet mundësinë për të shkëputur nëntë pikë diferencë në krye të tabelës. “Macet e Zeza”, në anën tjetër, ngjiten në vendin e tretë pas ndeshjes së katërt radhazi pa humbje.
