Eintracht Frankfurt është kthyer në një nga klubet më të zgjuara të tregut europian të transferimeve. Me një strategji të qartë për të identifikuar dhe zhvilluar talente të rinj, klubi gjerman ka realizuar shitje të mëdha që kanë sjellë qindra miliona euro në arkat e tij – pa sakrifikuar performancën sportive.
Shembulli më i fundit është transferimi i sulmuesit francez Hugo Ekitike te Liverpool për 90 milionë euro. Kjo lëvizje vjen pas një serie transferimesh të ngjashme që përfshijnë emra si Luka Joviç dhe Sebastien Haller, të cilët u shitën për shuma të mëdha, por nuk arritën të përmbushin pritshmëritë në klubet e tyre të reja.
Në vitin 2019, Joviç u transferua te Real Madridi për 63 milionë euro pas një sezoni spektakolar me 27 gola në Gjermani, por u kthye shpejt në Frankfurt pasi nuk u përshtat në Spanjë. Haller, i cili shkëlqeu me Eintracht, nuk arriti të lërë gjurmë te West Ham dhe u largua pas vetëm një viti.
Megjithatë, ky model i Eintracht-it mbetet i jashtëzakonshëm: klubi ka arkëtuar afro 500 milionë euro nga shitja e tetë lojtarëve që kushtuan më pak se 60 milionë në total. Edhe pse lojtarët nuk shkëlqejnë gjithmonë në ekipet e mëdha, Frankfurt mbetet një shembull se si vizioni, skautimi dhe menaxhimi i mençur mund të shndërrohen në sukses të dyfishtë – ekonomik dhe sportiv.
