Humbja e dytë rresht e Cityt, Brighton fiton në minitën e 89-të
Manchester City vazhdoi nisjen e dobët në sezonin e ri të Premier League, duke humbur 2-1 ndaj Brighton në stadiumin “Amex”. Kështu, kampionët e Anglisë mbeten ende pa fitore ndaj Brighton që prej kohës kur Fabian Hürzeler mori drejtimin e skuadrës (1 barazim, 2 humbje).
Për Brighton, përballja me City-n në kërkim të fitores së parë të kampionatit nuk dukej aspak e lehtë – dhe u bë edhe më e vështirë kur, që në minutat e para, Erling Haaland shpërdoroi një rast të artë pas pasimit të Omar Marmoush. Goditja e norvegjezit, larg standardeve të tij, u ndal lehtësisht nga portieri Bart Verbruggen. Shpejt pas kësaj, edhe Kaoru Mitoma pati mundësinë e artë për Brighton, por James Trafford reagoi në kohë duke shpëtuar portën e City-t.
Haaland mbeti rreziku kryesor i “Qytetarëve” gjatë pjesës së parë, por Verbruggen vazhdoi ta ndalte. Megjithatë, në paraqitjen e tij të 100-të në Premier League, “bomberi” norvegjez nuk mund të ndalej pafund. Në minutën e 32-të ai përfitoi nga një top i lirë në zonë dhe e shtyu në rrjetë, duke i dhënë City-t epërsinë.
Skuadra e Guardiolës hyri fuqishëm edhe në pjesën e dytë dhe pati shansin të dyfishonte avantazhin kur Oscar Bobb nuk arriti të devijonte saktë një top të ardhur nga Marmoush. Brighton reagoi menjëherë me Yankuba Minteh, i cili detyroi Trafford të ndërhynte sërish. Pak më vonë, pas një prekjeje me dorë të Matheus Nunes në zonë, gjyqtari dha penallti. James Milner, ish-lojtar i City-t, u tregua i saktë nga pika e bardhë, duke u bërë golashënuesi më i vjetër i Premier League nga penalltia.
Në minutat e fundit, Brighton ushtroi presion të madh, me goditjet e Brajan Gruda-s dhe Jan Paul van Hecke-s që testuan sërish Trafford. Rezistenca e City-t u thye në minutën e 89-të, kur Gruda përfitoi nga një hapësirë, kaloi portierin Trafford dhe shënoi në portën bosh, duke vulosur fitoren e parë të sezonit për “Pulëbardhat”.
Një Pep Guardiola i dëshpëruar mbeti duke u çuditur sesi skuadra e tij arriti të shpërdorojë një tjetër avantazh 1-0 për të humbur 2-1 në “Amex”, për të dytin vit radhazi.
