Lionel Messi ka rënë dakord për të zgjatur qëndrimin te Inter Miami me një kontratë të re shumëvjeçare, që pritet të jetë edhe e fundit në karrierën e tij. Sipas Miami Herald, përcjellë Kërlaçki, marrëveshja është finalizuar pas muajsh negociatash dhe zyrtarizimi pritet brenda dhjetë ditësh.
Argjentinasi 38-vjeçar përfiton 20.45 milionë dollarë në vit, ndërsa vlera totale e kontratës arrin në 130-150 milionë dollarë, përfshirë edhe aksione në klubin e Miamit pas përfundimit të karrierës si futbollist.
Një investim që u shpërblye
Para ardhjes së Messit në verën e vitit 2023, Inter Miami gjeneronte rreth 50-60 milionë dollarë në vit. Vetëm pas gjashtë muajsh, të ardhurat u dyfishuan, ndërsa për këtë vit pritet të arrijnë në 300 milionë dollarë. Çmimet e biletave, sponsorët dhe shitjet e fanellave kanë njohur rritje rekord.
Në fushë, Messi ka qenë po aq vendimtar: 75 ndeshje, 62 gola dhe 30 asistime me fanellën e Inter Miamit.
Fiton shumë më tepër se paga zyrtare
ESPN nënvizon se paga bazë është vetëm një pjesë e të ardhurave të tij. Një pjesë e madhe vjen nga marrëveshja me Apple, e cila i paguan një përqindje nga të ardhurat e transmetimeve të MLS-së.
Për krahasim, paga mesatare në ligë është 649 mijë dollarë, ndërsa Messi kryeson bindshëm listën e më të paguarve:
Top 4 lojtarët më të paguar në MLS:
-
Lionel Messi (Inter Miami) – 20.45 milionë $
-
Sergio Busquets (Inter Miami) – 8.5 milionë $
-
Miguel Almirón (Atlanta United) – 7.87 milionë $
-
Hirving Lozano (San Diego) – 7.63 milionë $
