Dy nga skuadrat surprizë në garën për titull këtë sezon në Serie A, përballen në një sfidë të madhe në “San Siro”, ku gjigantët AC Milan dhe Roma testojnë ambiciet e tyre në javët vendimtare të kampionatit.
Milan e nis këtë javë katër pikë pas mysafirëve kryesues, pas një forme jo të mirë ku ka barazuar tre nga katër ndeshjet e fundit (1 fitore), përfshirë edhe përballjen e mesjavës me Atalanta (1-1), ku arritën të shpëtonin me një pikë falë të vetmit goditje në portë gjatë gjithë ndeshjes! Ky rezultat e çoi në nëntë ndeshje radhazi serinë pa humbje të kuqezinjve në të gjitha garat (6 fitore, 3 barazime), pesë prej të cilave janë zhvilluar në shtëpi (4 fitore, 1 barazim). Një sfidë ndaj një tjetër gjiganti të futbollit italian nuk pritet t’i trembë djemtë e Massimiliano Allegrit, sidomos kur të vetmet pikë të humbura në San Siro këtë sezon kanë ardhur ndaj të sapongjiturve Cremonese dhe Pisa!
Nga ana tjetër, Gian Piero Gasperini ka bërë një nisje thuajse perfekte në pankinën e Romës, duke e çuar skuadrën në kuotën më të lartë të pikëve për këtë fazë të sezonit që nga viti 2014/15. Verdhekuqtë ndodhen në vendin e dytë, vetëm pas kampionëve të Napolit për shkak të golavarazhit. Pasardhësi i Claudio Ranierit ka ruajtur vazhdimësinë, duke regjistruar 70 pikë në vitin 2025 — më shumë se çdo skuadër tjetër në kampionat. Ky rekord mbresëlënës është ndërtuar mbi një formë të shkëlqyer jashtë fushe: Roma ka fituar gjashtë ndeshje radhazi në transfertë në të gjitha garat dhe ka humbur vetëm një herë larg shtëpisë në Serie A gjatë këtij viti kalendarik (11 fitore, 2 barazime).
Historia e përballjeve direkte
Fitorja 3-1 e Romës ndaj Milanit në takimin e fundit ishte triumfi i parë i verdhekuqve në kampionat ndaj kuqezinjve që nga tetori i vitit 2019 (4 barazime, 6 humbje). Ndërkohë, Milan nuk ka humbur asnjë nga shtatë sfidat e fundit të luajtura në shtëpi kundër Romës në Serie A (4 fitore, 3 barazime).
Statistika dhe seri interesante
-
Milan ka shënuar saktësisht nga dy gola në secilën nga tre ndeshjet e fundit në shtëpi.
-
Kuqezinjtë ishin një nga dy skuadrat që nuk kishin qenë në disavantazh në pjesën e parë pas nëntë javësh kampionati (3 fitore, 6 barazime në pjesët e para).
-
Shtatë nga tetë fitoret e Romës këtë sezon janë arritur me diferencë minimale.
-
Ndeshjet e Romës jashtë fushe kanë prodhuar vetëm një gol në pjesët e dyta këtë sezon.
Lojtarët kyç dhe mungesat
Mesfushori i Milanit, Samuele Ricci, është përfshirë në gola në dy ndeshjet e fundit (1 gol, 1 asist), por ka një bilanc shumë negativ ndaj Romës: vetëm një barazim dhe shtatë humbje në tetë përballje. Nga ana tjetër, Matías Soulé pritet të jetë arma e rrezikshme e Romës, pasi ka asistuar dhe shënuar në dy takimet e fundit ndaj Milanit (1 gol, 2 asiste).
Sulmuesi Santiago Giménez doli i dëmtuar në mesjavë dhe i bashkohet Christian Pulisic në listën e mungesave për Milanin. Roma, ndërkohë, do të jetë pa Evan Ferguson për shkak të një dëmtimi në kyçin e këmbës.
