Stefano Pioli ka refuzuar të japë dorëheqjen pas një bisede të gjatë me drejtuesit e Fiorentinës, ndonëse pozita e tij mbetet në pikëpyetje. Daniele Galloppa, trajneri i ekipit U20, shihet si një zgjidhje e mundshme për postin në mënyrë të përkohshme, ndërsa bisedimet me Paolo Vanoli nuk kanë sjellë ndonjë përparim konkret.
Fiorentina ndodhet në vendin e 19-të të renditjes në Serie A, me vetëm katër pikë të grumbulluara pas dhjetë javësh kampionat. Ekipi ende nuk ka shijuar një fitore në ligë dhe humbi 1-0 në shtëpi ndaj Lecce të dielën.
Pas ndeshjes, Pioli zhvilloi një telefonatë të gjatë me drejtuesit e klubit ku ritheksoi vendosmërinë për të mos u tërhequr nga detyra. Burime pranë klubit bëjnë të ditur se trajneri shprehu gatishmërinë për të rishikuar termat e kontratës trevjeçare me klubin, por theksoi se nuk do të japë dorëheqjen.
Fiorentina i kërkoi zyrtarisht dorëheqjen, por refuzimi i Piolit do ta detyrojë klubin të ndërmarrë hapat e mëtejshëm për një zgjidhje.
Skuadra do të rikthehet në fushë të enjten, kur do të përballet me Mainz në Conference League. Në rast të një shkarkimi, Galloppa mund të marrë drejtimin e përkohshëm të ekipit.
Ndërkohë, bisedimet me Paolo Vanoli janë bllokuar, ndërsa emri i Raffaele Palladino përmendet si një rikthim i mundshëm. Daniele De Rossi është gjithashtu një kandidat që i është ofruar klubit, por aktualisht duket një opsion i pamundur.
