Alessandro Gabrielloni ka përjetuar një rrugëtim të jashtëzakonshëm me Como-n, duke kaluar nga Serie D në Serie A dhe duke u kthyer në një simbol të klubit. Golashënuesi i përkushtuar, i cili shënoi një gol vendimtar ndaj Romës në dhjetor 2024 – të parin për të në elitë – është shpërblyer nga klubi me një statujë në ambientet e stadiumit “Sinigaglia”.
Trajneri Cesc Fàbregas, një vit më parë, kishte deklaruar se Alessandro Gabrielloni meritonte një statujë për gjithçka kishte dhënë për skuadrën. Premtimi u bë realitet para fillimit të sezonit 2025–26, duke e kthyer sulmuesin në një legjendë të vërtetë për tifozët e Como-s.
Gabrielloni shkruan historinë me Como
Në minutën e 80-të, në një ndeshje të tensionuar kundër AS Romës, Alessandro Gabrielloni u fut në lojë dhe vetëm 12 minuta më vonë, realizoi golin e fitores për Como. Stadiumi “Giuseppe Sinigaglia” shpërtheu në festë, teksa prania e aktorëve të famshëm si Keira Knightley, Adrien Brody dhe Michael Fassbender i dha edhe më shumë shkëlqim mbrëmjes.
Goli i shënuar në minutën e 92-të pas një aksioni të bukur nga Nico Paz dhe Patrick Cutrone, e futi Gabriellonin në historinë e futbollit italian. Ai është vetëm lojtari i pestë që ka shënuar në të gjitha kategoritë me të njëjtin klub – nga Serie D deri në Serie A.
Gabrielloni iu bashkua Comos në vitin 2018 kur klubi ishte në Serie D. Me kalimin e viteve, ai u bë një figurë kyçe, me mbi 100 gola të shënuar dhe një lidhje të fortë me tifozët. I njohur për përkushtimin, ai ka fituar zemrat e të gjithëve jo vetëm me golat, por edhe me përulësinë dhe dashurinë për klubin.
Në një intervistë, ai u shpreh: “Lumturia për mua është topi që përfundon në rrjetë dhe drekat e së dielës me familjen”. Ndërsa kundër Romës nuk ishte në shtëpi, familja e tij ishte në stadium – dhe babai, me lot në sy, e kishte parashikuar: “E dija që do shënonte sot!”
