Klubi gjilanas Drita ka hyrë në historinë e futbollit kosovar duke siguruar për herë të parë kualifikimin në fazën e grupeve të Ligës së Konferencës.
Pas këtij suksesi madhor, drejtuesit e klubit kanë shpërblyer futbollistët dhe stafin me premio të konsiderueshme.
Të enjten mbrëma, bardhekaltrit konfirmuan kualifikimin e tyre pas fitores ndaj Differdange, duke e mbyllur fazën ‘play-off’ me rezultat të përgjithshëm 3-1. Ky ishte kulmi i një rrugëtimi të gjatë, i mbështetur me investime të mëdha ndër vite, që më në fund dha frytet e tij.
Përveç lavdisë sportive, Drita tashmë ka siguruar mbi 3 milionë euro të ardhura të garantuara nga UEFA, një injeksion i madh financiar për klubin. Mirëpo, drejtuesit nuk harruan të vlerësojnë edhe ata që e bënë këtë sukses të mundur.
Sipas burimeve të Telegrafit, futbollistët dhe stafi teknik janë shpërblyer me një premio totale prej 150 mijë eurosh, ku secili anëtar do të marrë nga 5 mijë euro për kontributin e dhënë në këtë arritje historike.
Me këtë kualifikim, Drita bëhet klubi i dytë nga Kosova që arrin fazën e grupeve të garave evropiane, duke ndjekur shembullin e Ballkanit, i cili e ka realizuar këtë dy herë më parë.
