Federata Evropiane e Hendbollit (EHF) ka konfirmuar 32 skuadrat e kualifikuara në raundin e tretë të Kupës Evropiane për femra në edicionin 2025/26, ndërsa ndër to bën pjesë edhe KHF Istogu – klubi i vetëm nga Kosova që siguroi kalimin tutje.
Istogu arriti të kualifikohet duke fituar të dyja ndeshjet e raundit të dytë ndaj skuadrës greke AEP Panorama, të zhvilluara në shtëpi. Fitorja 39:31 në takimin e parë rezultoi vendimtare, ndërsa barazimi 28:28 në ndeshjen e dytë ishte i mjaftueshëm për të siguruar kualifikimin me rezultat të përgjithshëm 67:59.
Me përfundimin e raundit të dytë, EHF ka bërë të ditur se shorti për fazën e tretë do të mbahet më 7 tetor në Vjenë, në orën 11:00. Në këtë raund marrin pjesë 32 skuadra, të ndara në dy vazo me nga 16 ekipe. KHF Istogu është pjesë e vazos së dytë dhe do të përballet me një skuadër nga vazoja e parë.
Në këtë fazë nuk ka kufizime për përballje mes skuadrave të së njëjtës shtet, me përjashtim të një rregulli të veçantë: skuadra serbe ZORK Bor nuk mund të përballet me KHF Istogu.
Ndeshjet e para të raundit të tretë do të zhvillohen më 8 dhe 9 nëntor, ndërsa ato të kthimit më 15 dhe 16 nëntor. Fituesit do të kualifikohen në fazën e 1/8 së finales, e paraparë të zhvillohet në fillim të vitit 2026.
Gara për trofeun e Kupës Evropiane EHF për femra pritet të intensifikohet më tej, me shumë skuadra që synojnë të shkruajnë historinë në skenën ndërkombëtare.
