Kosova ka arritur suksesin më të madh në historinë e saj futbollistike duke u renditur në vendin e 84-të në ranglistën e re të FIFA-s, pozitën më të mirë që nga anëtarësimi në këtë organizatë.
Në krahasim me listën e kaluar të publikuar më 18 shtator, Kosova ka përparuar për shtatë pozita, ndërsa vetëm Nigeria, Lesoto dhe Ishujt Faroe kanë shënuar ngritje më të madhe (+9). Ndërkohë, Greqia dhe Suedia kanë pësuar rënie me nga tetë pozita.
Pse kjo renditje ka rëndësi të madhe
Ranglista e FIFA-s luan rol vendimtar në përcaktimin e vazove për shortet e garave si Kupa e Botës 2026 dhe plejofet kualifikuese.
Sa më lart që renditet një përfaqësuese, aq më të lehtë i ka kundërshtarët potencialë dhe aq më të mëdha janë gjasat për sukses.
Në plejof do të marrin pjesë 16 përfaqësuese, nga të cilat katër do të kualifikohen direkt në Botëror.
Nga fundi në ngritje historike
Kosova ishte në vendin e 190-të në ranglistën e saj të parë më 2016. Që nga ajo kohë, ngritja ka qenë e vazhdueshme:
2017 – vendi 177
2019 – vendi 115
2021 – vendi 111
2023 – vendi 101
2024 – për herë të parë në Top-100, vendi 99
Sot, me pozitën 84, Kosova ka hyrë në mesin e përfaqësueseve më premtuese të futbollit ndërkombëtar.
Në nëntor, “Dardanët” do të përballen me Slloveninë dhe Zvicrën, dhe me këtë formë në rritje, rritja në ranglistë pritet të vazhdojë.
Ranglista përpilohet nga FIFA bazuar në rezultatet dhe forcën e kundërshtarëve – një tjetër tregues se Kosova po ecën me hapa të mëdhenj drejt elitës së futbollit botëror.
