Pavarësisht se Federata e Futbollit e Sllovakisë ende nuk e ka konfirmuar zyrtarisht stadiumin për përballjen e shumëpritur ndaj Kosovës më 26 mars, burimet dhe praktika e deritanishme tregojnë qartë dy opsionet më serioze ku mund të zhvillohet kjo ndeshje vendimtare.
Arena më e mundshme është Tehelné pole në Bratislavë, stadiumi nacional i Sllovakisë, i cili konsiderohet selia kryesore e ndeshjeve të kombëtares. Me kapacitet prej rreth 22,500 ulësesh dhe infrastrukturë moderne, ky impiant ka pritur shumicën e ndeshjeve të rëndësishme të përfaqësueses sllovake në vitet e fundit.
Alternativa kryesore mbetet Štadión Antona Malatinského në Trnava, një tjetër stadium modern që përdoret rregullisht nga kombëtarja për ndeshje ndërkombëtare. Me një kapacitet afro 19,000 vende, Trnava shihet si opsioni i dytë më i besueshëm në rast se vendimi nuk bie për Bratislavën.
Të dyja këto stadiume plotësojnë standardet e UEFA-s për zhvillimin e ndeshjeve të këtij niveli, ndaj pritet që njëri prej tyre të zyrtarizohet shumë shpejt si mikpritës i sfidës Kosovë – Sllovaki, një duel që pritet me interes të madh në të dyja vendet.
