Abissnet Superiore – Java e katërt pritet të sjellë përplasje të forta në krye dhe fund të tabelës

Pas tre javësh të para të kampionatit shqiptar, Elbasani kryeson renditjen me 7 pikë, duke treguar një rikthim të fuqishëm mes më të mirëve. Pas tyre ndodhet Vllaznia me 6 pikë, e ndjekur nga Teuta me 5, ndërsa Partizani, Egnatia dhe Vora mbajnë nga 4 pikë secila. Fundi i tabelës mbetet i mbushur me surpriza, pasi Flamurtari, Bylisi dhe Tirana ende nuk kanë shënuar fitore, duke e nisur kampionatin nën pritshmëritë e tyre.

Egnatia – Tirana: Një sfidë me shumë peshë për të bardheblutë, të cilët pas një nisjeje të dobët kërkojnë pikët e para të plota. Presioni është më shumë mbi Tiranën, që nëse dështon sërish, rrezikon të mbetet e shkëputur që herët.

Partizani – Elbasani: Përballja më e fortë e javës. “Demat e kuq” do të testojnë lidershipin e Elbasanit, që vjen me moral të lartë. Një fitore e Partizanit do të hapte garën në krye, ndërsa Elbasani kërkon të konsolidojë vendin e parë.

Dinamo – Bylis: Dinamo me objektiva të mëdha. Dinamo ka treguar luhatje, ndërsa Bylisi pas tre javësh pa fitore ka nevojë urgjente për pikë. Përballje gjigantësh të trajnerëve: Ilir Daja – Mirel Josa.

Vora – Flamurtari: Një duel mes skuadrave që kanë surprizuar me lojë të mirë, por pa shumë efikasitet. Flamurtari ende pa fitore, Vora me shanse për të hyrë mes ekipeve të kreut.

Teuta – Vllaznia: Një derbi i vogël i javës. Teuta është ekipi më i vështirë për t’u mposhtur deri tani (dy barazime), ndërsa Vllaznia ka treguar forcë në sulm. Një ndeshje që mund të përcaktojë se kush do të ndjekë Elbasanin në krye.

Kampionati po tregon se do të jetë i ekuilibruar, me shumë skuadra që synojnë Europën, ndërsa fundi i tabelës tashmë paralajmëron një luftë të ashpër për mbijetesë.