Barcelona mposhti Celta de Vigo me rezultatin 4-2 në La Liga, duke arritur fitoren e parë jashtë fushe pas katër ndeshjesh në të gjitha kompeticionet, dhe duke i dhënë fund serisë prej pesë fitoresh radhazi të galicienëve.
Takimi nisi me një ndërhyrje shpëtuese në vijën fatale nga Alejandro Balde, që vendosi tonin e duhur për Barcelonën. Më pas, katalanasit fituan një penallti, pasi Marcos Alonso ndali me dorë një gjuajtje drejt portës të Fermín López. Robert Lewandowski nuk gaboi nga pika e bardhë, duke kaluar Barcelonën në epërsi. Portieri i Celta-s, Ionut Radu, priti më pas një përballje një për një me Marcus Rashford, ndërsa në aksionin pasues, Sergio Carreira barazoi shifrat për vendasit. Loja vijoi me ritëm të lartë dhe pa dominim të qartë nga asnjëra palë në gjysmën e parë të ndeshjes.
Celta vazhdoi të kërcënonte me kundërsulme të shpejta nga Ferran Jutglà dhe Borja Iglesias, por përpara pushimit, Rashford dhuroi një krosim fantastik me harkim drejt zonës, që kaloi të gjithë mbrojtjen dhe u finalizua me vole nga Lewandowski për golin e dytë të tij. Por gëzimi zgjati pak: Jutglà asistoi për Iglesias, i cili me një goditje të menjëhershme në trekëndësh nuk i la asnjë mundësi Szczęsny-t, duke barazuar rezultatin në 2-2. Megjithatë, gjatë kohës shtesë të pjesës së parë, Lamine Yamal goditi fuqishëm me të djathtën dhe riktheu avantazhin për Barcelonën para pushimit.
Në pjesën e dytë, Barcelona mori kontrollin total të lojës. Celta u mbajt i mbyllur në gjysmëfushën e vet për më shumë se gjashtë minuta, ndërsa katalanasit qarkullonin topin me qetësi. Loja u qetësua dhe për rreth 20 minuta munguan rastet e pastra për të dyja skuadrat.
Ndërsa ndeshja i afrohej fundit, Rashford ekzekutoi një goditje këndi që gjeti Lewandowskin te shtylla e parë, dhe polaku e devijoi me kokë për golin e tij të tretë në këtë ndeshje – duke kompletuar tripletën.
Celta, përkundër përpjekjeve të saj, nuk arriti të kërcënojë më portën e Szczęsny-t, falë një menaxhimi të shkëlqyer të lojës nga Barcelona. Një karton i kuq në minutat shtesë për Frenkie de Jong është i vetmi element negativ për katalanasit, të cilët përfituan maksimalisht nga hapi fals i Real Madridit ndaj Rayo Vallecano më herët gjatë ditës – duke u afruar në vetëm tre pikë nga kreu.
Pavarësisht formës pozitive të javëve të fundit, Celta mbetet në vendin e 13-të në tabelë dhe duhet të sigurojë që kjo humbje të mos ndikojë në moralin e ekipit për ndeshjet në vazhdim.
