NBA po përballet me një nga skandalet më të mëdha kriminale në historinë e saj. Sipas ESPN, janë arrestuar ish-lojtari dhe trajneri aktual Chauncey Billups, si dhe basketbollisti i Miami Heat, Terry Rozier. Gazetari Joe Pompliano, pas konferencës për shtyp të mbajtur nga FBI, ka bërë publike disa prej detajeve kyçe të hetimit.
Hetuesit federalë konfirmuan arrestimin e Billups, Rozier dhe Damon Jones – trajner në NBA dhe ish-basketbollist, i cili më herët nuk ishte përmendur në këtë çështje. Në total, janë arrestuar 27 persona dhe 13 anëtarë të mafies në 11 shtete të ndryshme të SHBA-së. Ata përballen me akuza për bixhoz të paligjshëm, shantazh dhe transferim të paligjshëm fondesh.
Rozier parashikoi dalje të hershme nga loja dhe më pas numëroi fitimet me mafiozët
Gjashtë persona janë akuzuar për korrupsion në sport, pasi kanë shpërndarë informacione konfidenciale për lojtarë dhe ekipe të NBA-së, mbi bazën e të cilave janë vendosur baste. Pjesa tjetër e grupit është përfshirë në organizimin e lojërave të paligjshme të pokerit.
Më konkretisht, Terry Rozier njoftoi bashkëpunëtorët se më 23 mars 2023 do të largohej para kohe nga loja për shkak të një dëmtimi – gjë që edhe ndodhi. Ata vunë bast 200 mijë dollarë që Rozier do të luante nën nivelin e tij mesatar. Pas vetëm nëntë minutash loje, ai u tërhoq nga ndeshja dhe më vonë u filmua duke numëruar paratë e fituara në shtëpinë e tij bashkë me personat në fjalë.
Mafia kërcënonte lojtarin e Torontos për borxhe nga bixhozi
Edhe Jontay Porter, ish-lojtar i Toronto Raptors, ishte i përfshirë. Ai kishte borxhe të mëdha nga bixhozi dhe ka marrë kërcënime nga grupet mafioze, por nuk është përfshirë në listën e të pandehurve.
Të arrestuarit kishin përqendruar aktivitetin e tyre të paligjshëm kryesisht në ndeshjet e Charlotte Hornets, Portland Trail Blazers, LA Lakers dhe Toronto Raptors.
Chauncey Billups dhe Damon Jones përdoreshin si “kurth” në organizimin e pokerit të paligjshëm, duke joshur pjesëmarrësit me mundësinë për të luajtur kundër yjeve të NBA-së. Më pas, viktimat mashtroheshin me pajisje të manipuluara për përzierjen e letrave. Në total, dëmet financiare kapin shifrën prej 7 milionë dollarësh – njëra prej viktimave humbi plot 1.8 milionë dollarë.
