Martin Kind, president i bordit mbikëqyrës dhe aksionari kryesor i klubit gjerman Hannover 96, është rikthyer në stadium pas një periudhe të vështirë shëndetësore që për pak sa nuk i kushtoi jetën.
Në humbjen 2-3 ndaj Darmstadtit, 81-vjeçari u shfaq sërish në “Heinz von Heiden Arena”, duke shënuar një rikthim emocional. Pas tij qëndrojnë tri ndërhyrje të rrezikshme në shtyllën kurrizore dhe një operacion në zemër, i ndjekur nga një proces rehabilitimi që ende vazhdon, shkruan Bild.
Në një intervistë për Neue Presse, Kind falënderoi ekipin mjekësor dhe tha me sinqeritet:
“Në fakt, kam qenë tashmë i vdekur.”
Kur u pyet nga BILD nëse kjo ishte një metaforë apo realitet, ai u përgjigj:
“Kur përjeton një infarkt si ky, je realisht shumë pranë vdekjes.”
Katër operacione pas një jete pa spital
Problemet me zemrën e gjetën të papërgatitur.
“Isha i bindur se zemra ime ishte në rregull. Por u gabova,” pranoi Kind, duke shtuar se katër stendat që iu vendosën flasin vetë për gjendjen e tij.
Edhe pse në moshë të thyer, ai tregon se nuk kishte qenë kurrë më parë në spital — çka e bëri edhe më të vështirë përballimin e situatës.
“Katër operacione ishin një sfidë e madhe,” rrëfen ai, por shton me lehtësim:
“Fatmirësisht, të gjitha ishin të suksesshme.”
Rikuperim i ngadaltë, por plot shpresë
Kind tashmë është në fazë rikuperimi:
“Për rrethanat, ndihem mirë,” thotë ai. Shëndeti i përkeqësuar gjatë verës bëri që ai të mungonte në ndeshjen hapëse të sezonit ndaj Kaiserslauternit. Në shtator, e braktisi stadiumin vetëm dhjetë minuta pas fillimit të sfidës me Herthën, e cila parapriu ndërhyrjen kirurgjikale.
Për një kohë të gjatë ai i shmangu terapitë rehabilituese, duke u justifikuar me mungesën e kohës. Tani, megjithatë, ai duhet të përballet me pasojat:
“Pas pesë muajsh me probleme, normalisht humbet forca fizike dhe muskujt. Të gjitha duhet të ndërtohen nga e para. Por kam shumë shpresë”, përfundon ai.
Kush është Martin Kind? Nga Kërlaçki
Martin Kind është një nga figurat më të njohura dhe më të diskutueshme të futbollit gjerman të dekadave të fundit, i lidhur ngushtë me klubin Hannover 96. I lindur më 28 prill 1944 në Walsrode të Gjermanisë, ai është një sipërmarrës i suksesshëm dhe njeri i biznesit që e ka ndikuar ndjeshëm mënyrën se si drejtohet një klub futbolli në Gjermani.
Kind nisi karrierën e tij profesionale në vitet ’60 si praktikant në Siemens AG, përpara se të merrte në dorë biznesin familjar të aparateve të dëgjimit në vitin 1970. Ai e transformoi kompaninë “KIND Gruppe” në një nga markat më të mëdha gjermane në këtë fushë, me qindra filiale dhe mijëra punonjës.
Nga biznesi te futbolli
Në vitin 1997, Martin Kind u përfshi për herë të parë me klubin Hannover 96, duke u bërë kryetar i bordit mbikëqyrës. Në vitin 2006 ai mori edhe rolin e investitorit dhe drejtuesit ekzekutiv të klubit profesionist, duke e kthyer Hannover 96 në një model më të strukturuar financiarisht dhe menaxherialisht.
Nën drejtimin e tij, klubi fitoi stabilitet ekonomik dhe arriti të rikthehej në elitën e futbollit gjerman, edhe pse me ulje-ngritje sportive.
Debatet dhe kritikat
Roli i Martin Kind nuk ka qenë pa polemika. Ai është një nga kundërshtarët më të fortë të rregullës “50+1”, e cila garanton që shumica e votave në klubet gjermane të mbeten në duart e anëtarëve të tyre dhe jo të investitorëve privatë. Kind ka argumentuar se ky rregull pengon zhvillimin ekonomik të futbollit gjerman dhe aftësinë e klubeve për të konkurruar me skuadrat evropiane.
Megjithatë, një pjesë e madhe e tifozëve të Hannover 96 dhe e opinionit publik futbollistik e kanë parë këtë qasje si kërcënim për identitetin dhe demokracinë e klubeve sportive. Përpjekjet e tij për të marrë kontroll të plotë mbi klubin kanë shkaktuar protesta, debate të gjata dhe madje edhe përplasje ligjore.
Midis pasionit dhe biznesit
Historia e Martin Kind dhe Hannover 96 është një pasqyrë e përplasjes mes pasionit të tifozëve dhe logjikës së biznesit në futbollin modern. Ai mbetet një figurë që ka ndryshuar mënyrën se si shihet drejtimi i klubeve në Gjermani — për disa, një reformator i guximshëm; për të tjerët, një simbol i komercializimit të futbollit.
