Fundjavë e pasur me emocione në Superligën e Kosovës – fitore të rëndësishme për Dukagjinin dhe Ferizajn, ndërsa Ballkani ndalet në shtëpi.
Në një javë të mbushur me duele të forta, Dukagjini shënoi fitore të bindshme 2-0 ndaj Gjilanit, duke iu rikthyer fitoreve në shtëpi. Ferizaj, ndërkohë, triumfoi minimalisht ndaj Prishtinës së Re falë një autogoli të Prençit, ndërsa Ballkani nuk arriti më shumë se një barazim 1-1 me Malishevën, në një ndeshje ku rastet nuk munguan. Superliga po ofron rivalitet dhe rezultate të papritura javë pas jave.
Ballkani dhe Malisheva ndajnë pikët në Suharekë, barazim 1-1 mes rasteve dhe tensionit
Ballkani dhe Malisheva kanë ndarë nga një pikë në ndeshjen e zhvilluar në stadiumin e qytetit në Suharekë, e cila përfundoi me rezultat 1-1. Takimi ishte dinamik dhe me shumë raste në të dyja portat.
Mysafirët kaluan të parët në epërsi në minutën e 11-të, pas një kundërsulmi të shpejtë ku Xhylani asistoi për Altin Aliun, i cili finalizoi saktë për rezultatin 0-1. Malisheva kishte edhe një mundësi të artë për të dyfishuar avantazhin në minutën e 16-të, por gjuajtja me kokë e Feratit u ndal nga traversa.
Ballkani reagoi në pjesën e dytë dhe arriti të barazojë në minutën e 62-të. Pas një goditjeje këndi dhe një tollovie brenda zonës, Giovanni përfitoi nga ngatërresa në mbrojtjen kundërshtare dhe barazoi rezultatin në 1-1.
Në minutat e mbetura të ndeshjes, të dy skuadrat kërkuan fitoren. Almir Kryeziu ishte shumë aktiv për vendasit, duke krijuar disa raste të rrezikshme, ndërsa Ibishi dhe Ferati kërcënuan portën e Ballkanit në disa raste, por pa sukses.
Pavarësisht përpjekjeve, asnjëra prej skuadrave nuk arriti të shënojë golin e fitores dhe ndeshja përfundoi në barazim.
Dukagjini i pandalshëm në shtëpi, mposht Gjilanin me rezultat 2-0
Dukagjini ka regjistruar një fitore të merituar në shtëpi, duke mposhtur Gjilanin me rezultat 2-0 në kuadër të javës së dytë në Superligën e Kosovës.
Goli i parë i ndeshjes erdhi në minutën e 34-t, kur Hugo harkoi nga këndi dhe Pefqeli u shkëput mbi të gjithë, duke shënuar me kokë nga pika e penalltisë për epërsinë 1-0.
Në pjesën e dytë, të dy skuadrat patën raste për të shënuar, por ishin vendasit që vulosën fitoren në minutën e 90+1, me Elijesa Zylfijin që realizoi për 2-0 pas një aksioni të shpejtë.
Gjilani pati disa tentativa të rrezikshme, por nuk arriti të finalizojë. Momente tensioni pati në minutën e 73-të, pas një gabimi të rëndë të portierit Laroshi, i cili u akuzua nga vendasit se preku topin me dorë jashtë zonës – një rast që ngjalli shumë polemika, por gjyqtari nuk ndërhyri.
Fitorja e konsolidon Dukagjinin si një skuadër solide në fushën e vet, ndërsa Gjilani largohet pa pikë, ndonëse pati disa mundësi të mira për të ndryshuar fatin e takimit.
Autogoli i Prençit i jep fitoren Ferizajt ndaj Prishtinës së Re
Ferizaj ka arritur një fitore minimale por të rëndësishme në udhëtim, duke mposhtur Prishtinën e Re me rezultat 0-1 në stadiumin “Sami Kelmendi” në Lipjan. Goli i vetëm i ndeshjes erdhi në minutën e 63-të dhe ishte rezultat i një autogoli nga mbrojtësi Elvis Prençi.
Takimi nuk solli shumë raste të pastra për shënim, me të dy skuadrat që patën vështirësi në krijimin e aksioneve të rrezikshme. Megjithatë, Ferizaj kontrolloi më mirë lojën, sidomos në pjesën e dytë, dhe u mbështet fuqishëm nga tifozeria e saj “Ujqit”, e pranishme në numër të madh.
Në minutat e fundit, Prishtina e Re pati një rast të mirë me Berishën, i cili gjuajti me kokë por pa sukses. Nga ana tjetër, Ferizaj kishte mundësinë të dyfishonte avantazhin në sekondat e fundit, por Topallaj gaboi pranë portës pas një kundërsulmi të shpejtë.
Kjo fitore e ngjit Ferizajn në vendin e parë në renditje, ndërsa Prishtina e Re mbetet me tre pikët e fituara në javën e parë në Malishevë.
