Stadiumi i ri i Evertonit, “Hill Dickinson Stadium”, debutoi me atmosferë madhështore në ndeshjen e parë të Premier League kundër Brighton.
Gjatë pjesës së dytë, zhurma e tifozëve arriti në 126 decibelë, një nivel i jashtëzakonshëm që e vendos arenën e re në mesin e pesë regjistrimeve më të larta të zhurmës ndonjëherë në një stadium futbolli.
Ky fakt nënvizon fuqinë dhe pasionin e tifozëve “Toffees” në shtëpinë e tyre të re, përcjellë Kërlaçki.
Matja u regjistrua në ditën e parë zyrtare të ndeshjeve në stadiumin e ndërtuar në zonën e Bramley-Moore Dock, duke e bërë përurimin e tij historik edhe më të veçantë.
Përveç rezultatit në fushë, përjetimi i një atmosfere të tillë tregoi qartë se Evertoni ka sjellë në Premier League një stadium që tashmë konsiderohet ndër më të zhurmshmit në botë.
Ky moment i veçantë është dëshmi e përkushtimit të tifozëve të klubit, të cilët krijuan një mjedis të jashtëzakonshëm dhe i dhanë jehonë botës së futbollit për mënyrën se si përkrahin skuadrën e tyre.
Një nivel i tillë zhurme nuk është vetëm rekord teknik, por edhe pasqyrë e lidhjes së fortë mes klubit dhe komunitetit të tij.
Për Evertonin, ky ishte një kapitull i ri pas largimit nga stadiumi historik “Goodison Park”. Kalimi në një impiant modern e të sofistikuar si “Hill Dickinson Stadium” jo vetëm që i ofron klubit kushte të reja, por edhe ruan shpirtin e traditës dhe pasionin e tifozëve. Me një hyrje kaq të fuqishme, stadiumi i ri ka shënuar menjëherë vendin e vet në historinë e futbollit anglez.
