Mbrëmjen e kaluar, në emisionin “Procesi Sportiv” në Top Channel, u raportua se një futbollist i Kombëtares shqiptare është shumë afër marrëveshjes për të blerë klubin e Lushnjës.
Bëhet fjalë për Rey Manajn, i cili ka nisur bisedimet për të marrë në pronësi skuadrën nga qyteti i tij i origjinës.
“Moda e futbollistëve të suksesshëm që blejnë klube ka mbërritur edhe në Shqipëri. Rey Manaj po bën një hap të madh duke investuar te Lushnja. Ky është një model që na duhet për të ecur përpara”, u shpreh moderatori i emisionit.
Edhe të ftuarit në studio e pranuan se sulmuesi i Kombëtares është kandidati kryesor për këtë blerje, duke pasur parasysh lidhjet e tij të ngushta me Lushnjën.
Ky hap do ta vendoste Manajn në të njëjtën linjë me emra të mëdhenj të futbollit botëror që kanë zgjedhur të investojnë në klube, si David Beckham, pronar i Inter Miamit në SHBA, apo Ronaldo “Fenomeni”, i cili prej disa vitesh zotëron Real Valladolid në Spanjë.
