Vetëm shtatë klube votuan pro ‘ankorimit’ në mbledhjen e së premtes. Sistemi i kufizimit të shpenzimeve lejon maksimumi 85% të të ardhurave, shkruan The Guardian, përcjell Kërlaçki.
Klubet e Premier League votuan në mënyrë dërrmuese kundër propozimit për vendosjen e rregullit të diskutueshëm të “ankorimit”, por miratuan një sistem të ri financiar të quajtur “raporti i kostos së skuadrës” (SCR), duke hapur rrugën për një epokë të re në rregullimin financiar të kampionatit.
Plani i “ankorimit nga poshtë-lart” (TBA) parashikonte që shpenzimet e çdo klubi të lidhen me një shumëfish të të ardhurave të klubit të fundit në renditje të sezonit të kaluar, të cilat shpërndahen nga të ardhurat qendrore të ligës. Ky propozim ka qenë prej kohësh i kundërshtuar nga të dy klubet e Manchesterit dhe në votimin e mbajtur të premten në Londër, 12 klube votuan kundër, shtatë pro, ndërsa Burnley abstenoi.
Ndryshe nga TBA, propozimi për sistemin SCR gjeti më shumë konsensus: 14 klube votuan në favor dhe gjashtë kundër. Sipas burimeve, kundërshtarët ishin Bournemouth, Brighton, Brentford, Crystal Palace, Fulham dhe Leeds.
Shpenzime të kufizuara në 85% të të ardhurave
TBA ishte përballur me kritika të ashpra javët e fundit, me Shoqatën e Futbollistëve Profesionistë (PFA) dhe agjentët e lojtarëve që kërcënuan me padi nëse do të miratohej. Edhe vetë klubet filluan të shfaqin shqetësime për kufizimin absolut të shpenzimeve, çka mund të ketë ndikuar në rezultatin përfundimtar të votimit.
Miratimi i SCR-së nënkupton fundin e rregullave të mëparshme të “fitimprurjes dhe qëndrueshmërisë”. Nga sezoni i ardhshëm, klubet do të kufizohen të shpenzojnë jo më shumë se 85% të të ardhurave nga futbolli dhe fitimit/humbjes neto nga shitja e lojtarëve për shpenzime që lidhen drejtpërdrejt me fushën, përfshirë pagat dhe tarifat e transferimeve. Shkelja e këtij “pragu jeshil” do të rezultojë në gjoba, ndërsa kalimi i një “pragu të kuq” prej 115% do të sjellë sanksione sportive, më së shumti me zbritje pikësh.
Ky sistem do të funksionojë paralelisht me kufizimet e ngjashme të vendosura nga UEFA për klubet që marrin pjesë në garat evropiane, rregulla që këtë sezon prekin nëntë nga 20 klubet e Premier League.
Sistemi i qëndrueshmërisë dhe rezistencës sistematike
Një masë e tretë, e quajtur “qëndrueshmëri dhe rezistencë sistematike” (SSR), u miratua në mënyrë unanime. Ajo përfshin tre teste që vlerësojnë qëndrueshmërinë financiare të një klubi në periudhën afatshkurtër, afatmesme dhe afatgjatë. Klubet do të duhet të tregojnë se kanë fonde të mjaftueshme për të mbuluar kostot e sezonit aktual dhe “luhatjet e papritura”. Një test likuiditeti do të sigurojë aftësinë për përballimin e “goditjeve financiare të natyrshme në këtë industri”, përfshirë rënien nga liga. Një test i tretë vlerëson nivelin e borxhit të një klubi në raport me ndryshimet sistemike të mundshme, si rënia e të ardhurave nga të drejtat televizive.
Premier League njoftoi se këto rregulla të reja janë zhvilluar përmes “konsultimeve të gjera me klubet dhe palët e tjera të interesuara” dhe janë krijuar për të funksionuar “në përputhje me rregullat e UEFA-s dhe me objektivat e Rregullatorit të Pavarur të Futbollit”.
Fillimi i sezonit 2026/27 shtyhet me një javë
Gjithashtu, Premier League bëri të ditur se sezoni i ardhshëm do të nisë një javë më vonë për t’i dhënë lojtarëve më shumë kohë për pushim pas Kupës së Botës. Java e parë do të luhet në fundjavën e 22 gushtit 2026, 33 ditë pas finales së Botërorit, ndërsa raundi i fundit do të zhvillohet më 30 maj 2027. Po ashtu, do të rikthehet kalendari tradicional i ndeshjeve në “Boxing Day”, pas një viti me vetëm një ndeshje të parashikuar në këtë datë.
