Liverpool “rikthehet në marshe” me fitoren ndaj Aston Villas.
Liverpool i Arne Slot i dha fund serisë negative prej pesë humbjesh radhazi në kampionatin vendas, duke arritur fitoren e parë në Premier League që nga shtatori, pas një triumfi 2-0 në “Anfield” ndaj Aston Villas.
Për të dytën javë radhazi, “The Reds” luajtën nën dritat e reflektorëve të shtunën në mbrëmje, por këtë herë përballë tifozëve të tyre, në stadiumin ku nuk kishin shijuar fitoren që nga shtatori. Megjithatë, sfida nuk ishte aspak e lehtë, pasi përballë kishin një Aston Villa në formë, që vinte pas gjashtë ndeshjesh të pamposhtura në ligë (4 fitore, 2 barazime), përfshirë një sukses të madh kundër Manchester Cityt javën e kaluar.
Në minutat e para, heshtja iu afrua tribunave të “Anfield”, kur Morgan Rogers ishte pranë finalizimit të një aksioni të shkëlqyer pas kombinimit me Ollie Watkins, por goditja e tij u përplas në shtyllë. Të dyja skuadrat treguan rrezikshmëri në sulm: Dominik Szoboszlai provoi nga distanca me një goditje të fortë që kaloi pranë shtyllës, ndërsa Andrew Robertson gjuajti një top që përfundoi në duart e Emiliano Martínez. Në krahun tjetër, portieri i Liverpoolit, Giorgi Mamardashvili, u detyrua të ndërhynte dy herë për të ndalur tentativat e Aston Villas.
Goditja e Matty Cash, që devijoi lehtë nga Van Dijk, u devijua nga Mamardashvili në traversë, ndërsa më vonë ishte sërish Rogers që nuk arriti të mposhte portierin e “The Reds”. Në fundin e pjesës së parë, vendasit shtuan presionin dhe mendohej se kishin kaluar në avantazh në minutën e 43-të me një goditje me kokë të Hugo Ekitike, por goli u anulua për pozicion jashtë loje. Gjithsesi, goli erdhi në kohën shtesë: presioni i lartë e detyroi Martínez të gabojë në daljen me topin, dhe Mohamed Salah përfitoi duke realizuar me këmbën më të dobët – një gol historik, që e bën vetëm lojtarin e tretë në historinë e klubit me 250 gola.
Momentumi në anën e “The Reds”
Në pjesën e dytë, Aston Villa e nisi me vendosmëri dhe Evann Guessand ishte lojtari më i rrezikshëm, por Liverpooli qëndroi i fortë dhe nuk u tërhoq. Përkundrazi, vendasit dyfishuan epërsinë pak para shënimit të orës së lojës – sërish pas një presioni të lartë që çoi në rikuperimin e topit, Alexis Mac Allister shërbeu për Ryan Gravenberch, goditja e të cilit u devijua dhe përfundoi në rrjetë, duke shpërthyer festën në “Anfield”.
Në minutat e fundit, skuadra e Unai Emery hodhi gjithçka në sulm në kërkim të një përmbysjeje, por Ross Barkley humbi një rast ideal pas një asistimi nga Jadon Sancho, duke gjuajtur mbi traversë nga shumë pranë. Liverpool mbajti kontrollin dhe siguroi një fitore të çmuar, duke shmangur humbjen e pestë radhazi në ligë – një rekord negativ që nuk ishte përsëritur që nga shtatori i vitit 1953. Për Aston Villën, kjo ishte humbja e parë në Premier League që nga muaji gusht.