Milani po ndërton një projekt të ri ambicioz me synimin për t’u rikthyer në majat e futbollit evropian. Me një valë ndryshimesh në të gjitha hallkat, klubi kuqezi po krijon një identitet të freskët – dhe shqiptarët po luajnë një rol gjithnjë e më të rëndësishëm në këtë transformim.
Pas emërimit të Igli Tares në rolin e drejtorit sportiv dhe rikthimit të Massimiliano Allegrit në pankinë, “Djalli” ka bërë një tjetër hap të rëndësishëm në merkato me afrimin e mesfushorit Ardon Jashari nga Club Brugge. Futbollisti me origjinë shqiptare shihet si një investim i rëndësishëm për të ardhmen, me potencial për të bërë vendin e tij në zemër të mesfushës së Milanit.
Ndërkohë, sipas mediave italiane, pritet të ketë një tjetër përforcim me lidhje shqiptare. Berat Gjimshiti, shtylla e mbrojtjes së Kombëtares shqiptare dhe një nga lojtarët më të besueshëm te Atalanta, është futur në orbitën e Milanit si një alternativë serioze për repartin defensiv.
Lëvizja vjen në një moment kur Malick Thiaw mund të largohet nga kuqezinjtë, me disa klube të Premier League dhe Serie A të interesuara për shërbimet e tij. Në rast largimi, Milani kërkon një zëvendësues të gatshëm dhe me përvojë në kampionatin italian, dhe Gjimshiti shihet si profili ideal: lider, i qëndrueshëm dhe me eksperiencë të konsiderueshme.
Sipas “La Gazzetta dello Sport”, alternativa të brendshme si Jan-Carlo Simic, Davide Bartesaghi dhe Leoni janë në konsideratë, por emri i Gjimshitit qëndron në krye të listës për shkak të nivelit dhe kontributit të tij të provuar.
Nëse transferimi konkretizohet, Milani do të kishte në organikë tre lojtarë shqiptarë – Igli Taren në drejtim, Ardon Jasharin në mesfushë dhe Berat Gjimshitin në mbrojtje – një sinjal i qartë për ndikimin gjithnjë në rritje të shqiptarëve në skenën më të lartë të futbollit evropian.
