Trajneri i Gjilanit, Ardian Nuhiu, ka folur për mediat në prag të ndeshjes së javës së gjashtë të Superligës së Kosovës, ku skuadra e tij do të përballet me Drenicën – një përballje e drejtpërdrejtë mes dy ekipeve që ndajnë kreun e tabelës me vetëm një pikë diferencë.
Gjilani aktualisht ndodhet në vendin e pestë me 7 pikë, ndërsa Drenica renditet e katërta me 8 pikë. Prizrenasit kanë befasuar me fitoren ndaj Dritës në udhëtim, megjithëse kanë humbur në përballjet jashtë fushe kundër Suharekës dhe skuadrave të tjera pretendente.
Luhatjet në rezultate dhe ndryshimi i mentalitetit
“Futbolli është sporti më i bukur pikërisht për shkak të paparashikueshmërisë. Nuk fiton gjithmonë më i miri, apo ai që luan më bukur. Ka gjithmonë befasi – dhe kjo është arsyeja pse ne po përpiqemi ta stabilizojmë skuadrën, të ndryshojmë mentalitetin, dhe të hyjmë në çdo ndeshje me më shumë autoritet e përqendrim”, deklaroi Nuhiu.
Fitorja ndaj Ferizajt – meritë e plotë e lojtarëve
Trajneri i kuqebardhëve vlerësoi maksimalisht lojtarët për paraqitjen në fitoren e fundit ndaj Ferizajt.
“Gjithë meritat shkojnë për futbollistët. Ne si staf analizojmë kundërshtarin, por në fund janë lojtarët ata që e bëjnë diferencën. Ata treguan angazhim, disiplinë, vrapim dhe shpirt luftarak. Ishte një fitore e merituar falë përkushtimit të tyre.”
Analiza e Drenicës – një skuadër me cilësi dhe rrezik në kundërsulm
Duke folur për kundërshtarin e radhës, Nuhiu theksoi:
“Drenica është skuadër me shumë cilësi, që di të mbrohet mirë dhe të dalë shpejt në kundërsulm. Kanë lojtarë të shpejtë dhe janë të rrezikshëm në ndërprerje. Jemi përpjekur ta analizojmë maksimalisht dhe do të mundohemi të neutralizojmë sulmin e tyre. Por vëmendja kryesore do të jetë tek skuadra ime – personaliteti, identiteti dhe mënyra se si do të luajmë.”
Ai shtoi se Gjilani duhet të mësojë nga ndeshja që Drenica zhvilloi ndaj Dritës: “Duhet të kemi qasje serioze dhe përqendrim maksimal. Do të kërkojmë të shohim sërish shpirtin luftarak të skuadrës sonë.”
Objektivi: vazhdimësia dhe fitorja
“Fitorja në Ferizaj nuk ishte aksidentale, por humbja ndaj Malishevës ishte e pamerituar. Pres që skuadra të tregojë vazhdimësi dhe të arrijmë fitoren ndaj Drenicës”, përfundoi Nuhiu.
