Trajneri i Ballkanit, Orges Shehi, pas ndeshjes ndaj Gjilanit ka sqaruar se mungesa e qendërsulmuesit Sunday Adetunji nuk ka të bëjë me të ardhmen e tij, por me një dëmtim që lojtari ka pësuar.
Shehi theksoi se pavarësisht interesimeve dhe ofertave të mundshme, sulmuesi nigerian do të mbetet pjesë e kampionëve të Kosovës.
“Adetunji është golashënuesi ynë kryesor, në Europë 4 ndeshje 4 gola, një pikë kyçe e jona. Në Irlandë u zëvendësua për arsye dëmtimi. Patjetër që mund të ketë oferta për të, por unë mendoj që është pjesë e jona. Sipas informacioneve nga drejtuesit e klubit, ai do të jetë pjesë e jona edhe për dy vjet. Presim që të kthehet sa më shpejt nga dëmtimi”, deklaroi Shehi për “Kërlaçki.com”.
I pyetur nga “Kërlaçki” se çka ndodhi në Dublin të Irlandës, ku Ballkani u shpartallua nga Shamrock Rovers, Shehi u shpreh kështu:
“Kanë qenë ditë të vështira pas asaj humbjeje ndaj Shamrock Rovers, duhet të gjeja forcën të motivoja veten dhe skuadrën. Ne e humbëm ndeshjen për 6 minuta, kemi marrë gola në një distancë kohore prej 6 minutash”.
“Na vjen keq që humbëm prej gabimeve tona. Kanë qenë ditë shumë të vështira për ta harruar atë humbje, sepse kemi rrahur veten dhe kjo është për të ardhur edhe më keq”, përfundoi trajneri i Ballkanit.
Ballkani barazoi me Gjilanin 1:1.
