Granit Xhaka befasoi botën e futbollit këtë verë duke u transferuar te Sunderland.
Kapiteni i Zvicrës iu bashkua klubit anglez që këtë sezon u rikthye në Premier League, duke u larguar nga Bayer Leverkusen – skuadër me të cilën arriti deri në finalen e Europa League.
Transferimi u realizua për shumën e 15 milionë eurove dhe ngjalli shumë reagime në opinionin sportiv, pasi Xhaka ishte pjesë e një ekipi që garonte për titull në Gjermani.
Menaxheri i tij, Jose Noguera, në një intervistë për “Flashscore” shpjegoi arsyet që çuan mesfushorin shqiptar të kthehej sërish në elitën angleze. Ai zbuloi se Xhaka kishte mundësi të tjera shumë më të mëdha, por vendosi ndryshe.
“Xhaka kishte shumë interes nga klubet e Premier Ligës dhe Ligës së Kampionëve dhe refuzoi tre oferta të mëdha për t’u bashkuar me Sunderlandin këtë verë. Xhaka zakonisht luan në klube ku bëhet fjalë për Ligën e Kampionëve, tituj lige, finale kupash etj”.
“Megjithatë, ai donte të provonte diçka të re sepse dëshiron të bëhet trajner në të ardhmen. Kështu që ai e sheh këtë si një përvojë të re për të mësuar. Biseda e parë ishte në telefon me pronarin, Kyril Louis-Dreyfus, i cili është gjithashtu nga Zvicra dhe shumë i ri. Xhaka u lidh shumë mirë me Louis-Dreyfus dhe e pëlqeu vizionin që iu prezantua”, tha Noguera.
32-vjeçari ka nënshkruar kontratë trevjeçare me Sunderlandin. Ai rikthehet kështu në Premier League, ku më parë ishte pjesë e Arsenalit për shtatë sezone, nga viti 2016 deri në 2023.
