Barcelona bëri të ditur të martën se ndeshja e parë në shtëpi e këtij sezoni nuk do të zhvillohej në Camp Nou, vetëm pesë ditë para përballjes me Valencian të dielën mbrëma.
Përkundrazi, blaugranat do të luajnë kundër Los Che në Estadi Johan Cruyff, që ndodhet në qendrën stërvitore të klubit dhe ku zakonisht zhvillojnë ndeshjet Barcelona Femeni dhe Barça Atlètic.
Ky vendim ka shkaktuar pakënaqësi te tifozët e Valencias, të cilët nuk do të kenë mundësi të marrin pjesë për shkak të kapacitetit shumë të kufizuar, ndërsa Barcelona ka vendosur t’u japë përparësi anëtarëve të klubit.
Edhe nëse stadiumi mbushet i gjithi, pjesëmarrja do të jetë ndër më të ulëtat në historinë e La Ligës, me vetëm 6,000 ulëse të disponueshme.
Deri më tani, stadiumet më të vogla që kanë pritur ndeshje të La Ligës ishin ai i Eibarit, Ipurua (6,267 vende), dhe El Alcoraz i Huescas, i cili fillimisht kishte 5,000 vende, por u zgjerua në 8,000 gjatë periudhës së tyre në elitë. Ndërkohë, gjatë rinovimeve të Santiago Bernabeut, Real Madridi i zhvilloi ndeshjet në Alfredo Di Stéfano (5,700 vende), por ato u luajtën pa praninë e tifozëve.
Përveç Barcelonës që do të luajë në Johan Cruyff, gazeta Sport raporton se edhe Getafe aktualisht ka kapacitetin më të ulët në La Liga, me vetëm 11,000 vende të lejuara në Coliseum për shkak të punimeve.
Ironikisht, vetë Barcelona është mbajtësja e rekordit të pjesëmarrjes, pasi në vitet e mëparshme Camp Nou ka pritur deri në 125,000 tifozë, përpara se të bëheshin të detyrueshme ulëset e numëruara.
