Luka Donçiç i është bashkuar kombëtares së Sllovenisë përpara fillimit të Eurobasketit dhe rikthimi i tij ka ndezur entuziazëm të jashtëzakonshëm në këtë komb të apasionuar pas basketbollit.
Arsyeja është e qartë – Donçiç ndodhet në formën më të mirë fizike të karrierës së tij. Ai ka përmirësuar dukshëm trupin e vet, ka humbur dhjetëra kilogramë dhe ka kapërcyer problemet fizike që e kanë ndjekur që nga transferimi te Los Angeles Lakers.
Kjo rrit ndjeshëm shpresat që Sllovenia të jetë një nga kandidatët seriozë për medalje në Eurobasketin e ardhshëm.
Donçiç i është bashkuar kombëtares mbrëmjen e sotme, do të zhvillojë stërvitjen e parë nesër, ndërsa të premten do të zbresë në parket përballë Gjermanisë në një ndeshje miqësore që do të luhet në sallën Stozhice.
Trajneri i Sllovenisë, Aleksander Sekuliç, e priti me padurim yllin 26-vjeçar nga Ljubljana, duke deklaruar se gjithçka në ekip do të përshtatet me kapitenin.
“Jemi duke ndjekur planin dhe gjithçka do ta përshtatim me kapitenin. Lojtarët mezi po e presin – ai ka ndikim të madh në ekip, jo vetëm në lojë, por edhe jashtë fushës. Jam i lumtur që ka treguar motivim të lartë përpara Eurobasketit. Ai dëshiron të tregojë se me qasjen e duhur mund të arrijmë shumë në këtë kampionat”, ka thënë Sekuliç.
Ai shtoi gjithashtu se është i lumtur që do ta shohë këtë version fizikisht të transformuar të Donçiç në veprim dhe se ky ndryshim do të sjellë edhe më shumë vëmendje ndërkombëtare mbi përfaqësuesen e Sllovenisë.
