Futbollistët e Shkëndijës janë të përqendruar maksimalisht në përballjen e rëndësishme kundër Qarabag-ut nga Azerbajxhani, në kuadër të turit të tretë kualifikues të Ligës së Kampionëve.
Megjithatë, UEFA ka hedhur tashmë shortin për fazën “play-off”, duke përcaktuar çiftet e mundshme në këtë fazë vendimtare për hyrjen në grupet e Champions League.
Sipas shortit të zhvilluar sot në Nion të Zvicrës, fituesi i përballjes Shkëndija – Qarabag do të përballet në “play-off” me fituesin e çiftit Ludogorets (Bullgari) – Ferencvaros (Hungari).
Nëse Shkëndija arrin të kalojë Qarabag-un, ndeshjen e parë të fazës “play-off” do ta zhvillojë si mysafire më 20 gusht, ndërsa takimi i kthimit do të luhet në Shkup, më 27 gusht.
Çiftet e fazës “play-off” (Rruga e kampionëve):
Ludogorets / Ferencvaros – Shkëndija / Qarabag
Lech Poznan / Crvena Zvezda – Dinamo Kiev / Pafos
Bodo/Glimt – Sturm Graz
Celtic – Kairat / Slovan Bratislava
Basel – Malmö / Kopenhagen
Shkëndija është aktualisht klubi i dytë më i suksesshëm shqiptar në arenën evropiane, pas Skënderbeut të Korçës.
Tetovarët kanë tashmë një histori të pasur ndërkombëtare dhe me një kualifikim ndaj Qarabag-ut, do të jenë një hap larg hyrjes në fazën e grupeve – objektiv historik për klubin dhe futbollin shqiptar në Maqedoninë e Veriut.
