Pas pushimit dyjavor për shkak të ndeshjeve të Kombëtareve, sot rikthehet futbolli kosovar me xhiron e katërt të Albi Mall Superligës.
Katër ndeshje zhvillohen nga ora 15:00, ndërsa kryendeshja e javës luhet në mbrëmje, nga ora 20:15.
Gjilani, para tifozëve të vet, pret Malishevën dhe synon fitoren e radhës, teksa mysafirët kërkojnë këndelljen pas një fillimi jo të mirë të sezonit.
Ballkani është nikoqir i Drenicës, me të dyja skuadrat që synojnë pikë të vlefshme, ndërkohë që në Klinë zhvillohet dueli interesant mes Dukagjinit dhe Ferizajt. Në Lipjan, Prishtina e Re pret Llapin, ku të dy ekipet kanë nevojë urgjente për fitore.
Megjithatë, vëmendja kryesore i takon kryeqytetit. Në stadiumin “Fadil Vokrri”, Prishtina dhe Drita përballen në derbin më të madh kosovar. Atmosfera pritet të jetë e zjarrtë, me stadiumin e stërmbushur nga adhuruesit e dy skuadrave, teksa të dyja palët synojnë vetëm fitoren.
