Një nga klubet më të vjetra dhe me traditë në Holandë, Vitesse Arnhem, ndodhet në prag të shuarjes pas vendimit përfundimtar të gjykatës që i refuzoi kërkesën për rikthimin e licencës profesionale. Kjo vjen pas një vendimi paraprak të Federatës Holandeze të Futbollit (KNVB), e cila në muajin korrik kishte vendosur t’i heqë klubit licencën për shkak të shkeljeve të rënda.
Në një deklaratë zyrtare, klubi shprehu “zhgënjimin dhe shqetësimin e thellë”, duke theksuar se pavarësisht përpjekjeve intensive me investitorët, nuk ia dolën të shpëtonin situatën.
“Bëmë gjithçka që ishte e mundur në bashkëpunim me grupin e investitorëve, por nuk mjaftoi”, deklaroi Michel Schaap, president i grupit të investitorëve “De Sterkhouders”.
Vitesse, i themeluar në vitin 1892, ka një histori të gjatë në futbollin holandez, por trofeu i vetëm madhor në kabinetin e tij është Kupa e Holandës e fituar në vitin 2017. Problemeve iu shtua edhe një dënim i rëndë në sezonin e kaluar, kur klubi humbi 18 pikë dhe u përjashtua nga Eredivisie për lidhjet financiare me oligarkun rus Roman Abramovich.
KNVB e cilësoi humbjen e licencës si një “goditje të rëndë” për klubin, tifozët dhe stafin. Vitesse pritej të hapte sezonin e ri këtë fundjavë në kategorinë e dytë, por tashmë e ardhmja është e pasigurt. Drejtuesit e klubit po vazhdojnë bisedimet me palë të interesuara për të gjetur një zgjidhje që mund të shpëtojë Vitesse nga fundi i hidhur.
Lojtarët shqiptarë që kanë luajtur për Vitesse
Armando Broja – Sulmues në huazim nga Chelsea gjatë sezonit 2020‑2021, ku realizoi 10 gola në kampionat për Vitesse
Milot Rashica – ishte pjesë e Vitesse mes viteve 2015 dhe 2018, me 83 ndeshje dhe 13 gola në Eredivisie.
