Ballkani ka shënuar një fitore bindëse në javën e katërt të Superligës së Kosovës, duke mposhtur Drenicën me rezultat të pastër falë het-trikut të Valentin Serebes. Sulmuesi 22-vjeçar nga Bregu i Fildishtë po shndërrohet në yllin e tre-herë kampionëve, duke shënuar në dy ndeshje radhazi plot pesë gola.
Pas dopietës ndaj Ferizajt në javën e tretë, Serebe shpërtheu sërish, këtë herë me tri gola që e çuan bilancin e tij personal në 5 gola në vetëm 4 ndeshje. Forma e tij po i jep një tjetër dimension skuadrës së Orges Shehit, e cila tashmë duket se ka gjetur sulmuesin kryesor të sezonit.
I transferuar këtë verë nga gjiganti rumun CFR Cluj, Serebe është përshtatur shpejt në futbollin kosovar dhe po konfirmon pritshmëritë e larta. Kontributi i tij është bërë vendimtar për Ballkanin, që pas dy barazimeve në start të kampionatit, ka regjistruar fitore të rëndësishme dhe tashmë ka grumbulluar 8 pikë.
Kampioni në fuqi po rikthehet fuqishëm në garën për titull, ndërsa Serebe duket se do të jetë një nga emrat kryesorë të këtij edicioni në Superligën e Kosovës.
