Vedat Muriqi
Espanyoli vazhdoi formën e shkëlqyer në shtëpi, duke regjistruar fitoren e tretë radhazi këtë sezon në RCDE Stadium, me një triumf dramatik 3-2 ndaj Mallorcës, pavarësisht se luajti me 10 lojtarë për më shumë se një pjesë loje.
Vedat Muriqi, në superformë
Sulmuesi i përfaqësueses së Kosovës ka qenë protagonist i padiskutueshëm në këtë fillim sezoni. Dy gola në këtë ndeshje, një tjetër kundër Real Madridit, dhe një paraqitje mbresëlënëse ndaj Barcelonës – ndonëse e ndërprerë në minutën e 39-të nga një karton i kuq – dëshmojnë rëndësinë e tij në ofensivën e Mallorcës.
EL PIRATA!! 🤩🏴☠️
— Kosovo Football 🇽🇰 (@FootballKosovo) September 15, 2025
🚨 GOAL | Vedat Muriqi has scored from the spot.
🇪🇸 Espanyol 2-1 Mallorca pic.twitter.com/Q6lUvTTL2U
— Goals ⚽ (@Goals360hub) September 15, 2025
Ndeshja
Pas një pauze ndërkombëtare që nuk ua prishi aspak ritmin, “Los Periquitos” morën avantazhin që në pjesën e parë. Një gjuajtje e devijuar nga Roberto Fernández goditi traversën, përpara se Carlos Romero të krosonte nga e majta dhe Pere Milla të shënonte nga afërsia në minutën e 20-të. Vetëm 14 minuta më vonë, një kros i thellë nga Tyrhys Dolan gjeti të papërgatitur portierin Leo Román, dhe Fernández e shtyu topin në rrjetë për 2-0.
Por fundi i pjesës së parë solli një kthesë të papritur. Fillimisht, Pol Lozano shkaktoi penallti duke ndalur në mënyrë të parregullt Mateo Joseph brenda zonës, dhe sulmuesi i Kosovës, Vedat Muriqi, u tregua i saktë nga pika e bardhë. Në minutën e tretë shtesë, Pere Milla u ndëshkua me karton të kuq për protesta ndaj gjyqtarit, duke e lënë skuadrën e tij me një lojtar më pak.
Për Jagoba Arrasaten, kjo ishte mundësi për të thyer serinë negative që po e ndjek prej disa javësh, veçanërisht pas ndërprerjes së tensionuar, ku kapiteni Dani Rodríguez u pezullua pa pagesë. Mallorca u përpoq të rikthehej, por Marko Dmitroviç ndali përpjekjet e Joseph dhe Mojica, deri kur Muriqi barazoi gjithçka në minutën e 65-të me një goditje të fuqishme me kokë, duke konfirmuar formën e tij të lartë.
Kur gjithçka dukej se do të përfundonte në barazim, Espanyoli riktheu epërsinë në minutën e 81-të, kur Dolan u rrëzua në zonë dhe Kike García shënoi nga penalltia, duke çuar rezultatin në 3-2 dhe shpërthyer festën në tribuna.
Espanyoli ka fituar me një gol diferencë në katër përballjet e fundit ndaj Mallorcës si vendas, ndërsa skuadra nga Balearët mbetet në vendin e parafundit, me vetëm një pikë në katër ndeshje.
