Albian Hajdari ka bërë një hap të rëndësishëm në karrierën e tij, duke u transferuar nga Lugano te Hoffenheim në Bundesligë, një nga pesë ligat më të forta evropiane.
Mbrojtësi 22-vjeçar ishte një nga lojtarët më të dalluar te Lugano. Megjithëse pritej të kalonte në Ligën Premier, Hajdari përfundoi në Gjermani, ku do të bashkohet me Fisnik Asllanin dhe Leon Avdullahun, dy futbollistë me origjinë shqiptare që luajnë te Hoffenheimi.
Ky transferim erdhi pas lëndimit serioz të Koki Machidas, që krijoi nevojën për një qendërmbrojtës të ri në skuadër.
Hajdari është rritur në akademitë e Baselit dhe Juventusit, ndërsa te Lugano luan që nga viti 2022, duke u bërë një nga lojtarët kyç të ekipit.
“Mezi pres të filloj këtë sfidë te Hoffenheimi dhe në Bundesligën gjermane, një nga ligat më të forta evropiane. Bisedimet me drejtuesit e klubit ishin shumë pozitive. Synimi im është të jap gjithçka në fushë dhe të kontribuoj për objektivat e skuadrës,” tha Hajdari.
Në total, ai ka regjistruar 110 paraqitje për Luganon dhe nëntë për Baselin.
Në Superligën zvicerane ka luajtur 91 ndeshje, ndërsa 11 të tjera në Ligën e Konferencës dhe Kupën e Zvicrës.
