ZYRTARE: Vëllaznimi rikthen talentin gjakovar, Mark Bushaj
Vëllaznimi ka rikthyer në skuadër talentin gjakovar, Mark Bushaj. Klubi kuqezi e ka zyrtarizuar transferimin në faqen e tij zyrtare në Facebook.
Bushaj vjen te Vëllaznimi si huazim nga Malisheva, ku nuk arriti të gjejë hapësirat e pritura.
Ardhja e tij është e mirëpritur për trajnerin Xhengiz Rexhepi, i cili do të ketë një alternativë më shumë në sulm.
Ai është vëllai i ish-futbollistit të Vëllaznimit, Gjergj Bushaj, një prej talenteve më premtues të futbollit vendor gjatë dekadës së kaluar, i cili megjithatë nuk arriti potencialin e plotë për shkak të lëndimeve të shpeshta.
Skuadra gjakovare ka nisur mbarë edicionin në Ligën e Parë, duke mposhtur Feronikelin dhe 2 Korrikun, dhe aktualisht numëron gjashtë pikë pas dy xhirosh.
Nesër, Vëllaznimi do të presë Istogun në Gjakovë.
Pas duelit ndaj 2 Korrikut, “Kërlaçki.com” realizoi një intervistë të shkurtër me trajnerin e skuadrës, Xhengiz Rexhepin, të cilën mund ta lexoni duke klikuar më poshtë.
