Anglia regjistroi një fitore të qetë 2:0 ndaj Andorrës në Villa Park, duke forcuar pozitat në krye të Grupit K të kualifikueseve për Kupën e Botës 2026. “Tre Luanët” tani kanë fituar të gjitha tetë përballjet direkte me andorranët, me një golavarazh total prej 28:0.
Përballja ishte e ngjashme me atë të muajit qershor – dominim anglez përballë një mbrojtjeje të dendur të Andorrës. Megjithatë, debutuesi Elliot Anderson dhe Noni Madueke ishin mjaft aktivë në ndërtimin e aksioneve, duke krijuar disa raste për Eberechi Eze, i cili nuk arriti të finalizojë.
Goli i parë erdhi në minutën e 25-të, kur një krosim i Madueke u devijua në portën e vet nga Christian García, duke kaluar portierin Iker Álvarez.
Edhe pse në disavantazh, Andorra mbeti kompakte. Christian García ndërhyri për të ndalur një goditje të Declan Rice, ndërsa pak më vonë Harry Kane humbi me kokë një mundësi të mirë.
Në pjesën e dytë, Álvarez shpëtoi portën nga tentativa e Eze, ndërsa Marcus Rashford e dërgoi topin jashtë nga një pozicion i favorshëm. Portieri andorran u shfaq përsëri vendimtar duke ndalur një tjetër goditje nga Anderson.
Goli i dytë erdhi në minutën e 67-të, kur një kros i saktë nga Reece James u shfrytëzua nga Rice me një goditje të fuqishme me kokë.
Pas këtij goli, Thomas Tuchel bëri disa zëvendësime, por pavarësisht përpjekjeve të Morgan Gibbs-White pas një krosimi tjetër nga Madueke, rezultati mbeti i pandryshuar.
