𝐅𝐞𝐫𝐢𝐳𝐚𝐣 – 𝐁𝐚𝐥𝐥𝐤𝐚𝐧𝐢, 𝐝𝐮𝐞𝐥 𝐢 𝐱𝐡𝐢𝐫𝐨𝐬 𝐬𝐞 𝐭𝐫𝐞𝐭ë 𝐧ë 𝐒𝐮𝐩𝐞𝐫𝐥𝐢𝐠ë𝐧 𝐞 𝐊𝐨𝐬𝐨𝐯ë𝐬, premton shumë emocione dhe një sfidë ndryshe nga vitet e kaluara.
Statistikat flasin qartë në favor të suharekasve: në 10 përballjet e fundit mes dy skuadrave, Ballkani ka regjistruar 7 fitore, ndërsa 3 ndeshje janë mbyllur baras.
Ferizaj nuk ka arritur asnjëherë të triumfojë ndaj kampionëve të trefishtë në këtë periudhë, duke u shndërruar shpesh në “preh të lehtë” për ta.
Megjithatë, sezoni aktual ka sjellë një panoramë tjetër. Ferizaj i drejtuar nga Arsim Abazi e ka nisur fuqishëm kampionatin, duke marrë dy fitore në dy ndeshjet e para, një start perfekt që i jep moral dhe besim skuadrës.
Tashmë ferizajasit nuk shihen më si befasi, por si ekip i kompletuar dhe konkurrues serioz.
Në anën tjetër, Ballkani i Orges Shehut ende nuk e ka shijuar fitoren këtë edicion, me dy barazime nga dy ndeshjet e para. Për kampionët në fuqi, kjo sfidë shihet si momenti i duhur për të marrë tri pikët e para dhe për të mos lejuar shkëputjen nga rivalët në garën për titull.
Një duel mes dy skuadrave me objektiva të ndryshëm, por me nevojë të përbashkët për fitore – Ferizaj për të vazhduar ëndrrën e madhe dhe Ballkani për të ruajtur statusin e favoritit absolut në futbollin kosovar.
