Klubi prizrenas Bashkimi po vazhdon me përforcimet në prag të edicionit të ri të basketbollit, duke synuar një paraqitje sa më konkurruese.
Të mërkurën, Bashkimi ka zyrtarizuar afrimin e qendrës amerikane De’Quon Lake.
Basketbollisti 208 centimetra i gjatë vjen me përvojë të konsiderueshme nga ligat evropiane.
Pas përfundimit të karrierës kolegjiate në NCAA, Lake ka luajtur në disa shtete si Hungaria, Bjellorusia, Porto Riko dhe Polonia.
Edicionin e fundit ishte pjesë e skuadrës Atomeromu në Hungari, ku regjistroi mesatare prej 9.2 pikësh dhe 7.1 kërcimesh për ndeshje.
Lake i bashkohet dy amerikanëve tjerë tashmë të angazhuar nga Bashkimi, Kyan Anderson dhe Jeremiah Bailey, duke e kompletuar kështu një treshe të huajsh me potencial të madh për të ndihmuar ekipin në objektivat e sezonit të ri.
