Java e pestë e Superligës së Kosovës solli duele interesante dhe rezultate që kanë filluar të japin formë tabelës. Vëmendja kryesore ishte në Podujevë, ku Llapi dhe Ballkani ndanë pikët pas një barazimi 2:2 në kryendeshjen e xhiros.
Arbnor Ramadani dhe Hasan Hyseni ishin protagonistët e Llapit, ndërsa për suharekasit shkëlqeu Sare, i cili realizoi dy gola për të mbajtur ekipin e tij në garë deri në fund.
Pas katër xhirove pa fitore, Drita më në fund regjistroi fitoren e parë në sezon duke mposhtur Prishtinën e Re me rezultat 2:1.
Golat për gjilanasit u shënuan nga Veton Tusha dhe Arb Manaj, të cilët rikthyen besimin në skuadër. Për mysafirët realizoi Eze, por përpjekjet e tyre nuk mjaftuan për të shmangur humbjen e tretë sezonale.
Fitore të rëndësishme regjistroi edhe Prishtina, e cila triumfoi si mysafire ndaj Malishevës me rezultat 1:3. . Ky sukses i ngjit më lart kryeqytetasit në tabelë dhe iu jep moral për ndeshjet e ardhshme.
Një tjetër fitore në udhëtim erdhi nga Gjilani, që mposhti minimalisht Ferizajn. Robert Rrahmani ishte heroi i ndeshjes me golin e vetëm që i dha tri pikët skuadrës bardhekuq.
Në Skenderaj, Drenica dhe Dukagjini barazuan 1:1. Igball Jashari zhbllokoi sfidën për vendasit, por në minutat e fundit ishte Albion Pllana që shënoi për mysafirët, duke u siguruar një pikë të vlefshme në transfertë.
Superliga e Kosovës po tregon një konkurrencë të fortë në këtë fillim sezoni, me ekipe që kanë ambicie të mëdha dhe me rezultate që po e mbajnë tabelën të ngjeshur.
