Besa Famgas shënon fitore të rëndësishme në Kupën Evropiane

Besa Famgas ka shënuar një fitore të madhe evropiane të dielën mbrëma në palestrën “Karagaçi” në Pejë.

Skuadra pejane mposhti ekipin turk Depsas Enerji me rezultat 39:34, në ndeshjen e parë të raundit të parë të Kupës Evropiane në hendboll – niveli i tretë i garave kontinentale për klube.

Besa e nisi fuqishëm takimin dhe ruajti epërsinë deri në fund; pas pjesës së parë rezultati ishte 19:16, ndërsa në përfundim dallimi shkoi në pesë gola.

“Me gjithë fondin e kufizuar të lojtarëve, Besa Famgas tregoi shpirt luftarak dhe arriti një fitore me rëndësi për të ardhmen e klubit me traditë”, ka theksuar Federata e Hendbollit e Kosovës.

Ali Abdulah Zayan ishte protagonist kryesor me 14 gola, ndërsa Deniz Terziqi shtoi nëntë dhe Amar Muqolli shtatë. Jon Vokshi realizoi katër herë, Enis Kuleta e Edonis Hajra nga dy, dhe Ilir Istrefaj një. Portieri Olt Kabashi u dallua me 13 pritje vendimtare.

Ndeshja e kthimit do të zhvillohet të shtunën e ardhshme në Ankara. Në garat evropiane të hendbollit këtë sezon po marrin pjesë gjithsej shtatë skuadra nga Kosova.