Dinamo e pamëshirshme, mposht Vllazninë pastër 

Dinamo ka nisur edicionin e ri të Kategorisë Superiore me një fitore të madhe dhe plot vetëbesim ndaj një rivali të fortë si Vllaznia. Në ndeshjen e zhvilluar në “Elbasan Arena”, të përzgjedhurit e trajnerit Ilir Daja treguan forcë dhe vendosmëri, duke triumfuar me rezultat të pastër 3-1.

Pjesa e parë nisi e ekuilibruar, por dinamovitët u dukën më të organizuar në manovër dhe më këmbëngulës në fazën ofensive. Përpjekjet e tyre u shpërblyen në minutën e 35-të kur Dejvi Bregu, me një goditje të saktë, zhbllokoi sfidën dhe i dha epërsinë skuadrës kryeqytetase.

Në pjesën e dytë, Dinamo nuk u mjaftua me rezultatin minimal. Loja e tyre mori tjetër ritëm dhe presioni u konkretizua në minutën e 59-të, kur sulmuesi Saliou Guindo gjeti golin e dytë, duke e bërë ndeshjen edhe më të vështirë për shkodranët. Vllaznia u përpoq të reagonte, por nuk kishte qartësi në fazën sulmuese dhe shpesh u përball me mbrojtjen e fortë të bluve.

Kur ndeshja po shkonte drejt fundit, Dinamo i dha goditjen e tretë dhe përfundimtare kundërshtarit. Në minutën e 83-të, Hekuran Berisha shënoi një gol të bukur që vulosi suksesin e kryeqytetasve. Vllaznia arriti vetëm të ngushëllohej në sekondat e fundit, kur kapiteni Bekim Balaj realizoi golin e nderit, një shifër që nuk ndryshoi asgjë në fatin e sfidës.

Me këtë fitore të pastër, Dinamo jo vetëm që rikthehet fuqishëm në kampionat pas aventurës evropiane, por dërgon edhe një mesazh të qartë se do të jetë një nga pretendentët kryesorë për titullin kampion.