Turqia, një komb i madh me udhëheqje që shfaq tipare autoritare dhe një ekonomi të përballur me inflacion të lartë dhe rënie të vlerës së lirës turke: PO SHKËLQEN NË SPORT!
Murat Yenipazar dhe kombëtarja e Turqisë në volejboll shijuan çdo brohoritje nga tifozët filipinas, në një fitore historike ndaj Holandës në Kampionatin Botëror të Volejbollit për Meshkuj (FIVB), të zhvilluar në Arenën “SM Mall of Asia”, të shtunën.
Kombëtarja e Turqisë, aktualisht e renditur e 14-ta në botë, përmbysi një disfatë të ngushtë në setin e parë për të mposhtur Holandën (Nr. 20), me rezultatin 27-29, 25-23, 25-16, 25-19, duke siguruar për herë të parë një vend në çerekfinalet e Kampionatit Botëror të Volejbollit për Meshkuj “FIVB 2025”, të shtunën në arenën “SM Mall of Asia”.
Ylli i skuadrës, Adis Lagumdzija, shkëlqeu me 28 pikë, të ndërtuara mbi 25 sulme të suksesshme, dy “ace” dhe një bllok, duke shtuar gjithashtu edhe tetë pritje në mbrojtje. Me këtë paraqitje, Turqia, që në edicionin e kaluar ishte renditur në vendin e 11-të, kaloi çdo pritshmëri dhe shënoi suksesin më të madh në historinë e saj në këtë kompeticion.
“Bëmë histori sot duke mposhtur Holandën dhe duke arritur çerekfinalet. Ky ishte objektivi ynë për këtë verë. Jemi stërvitur për katër muaj – si çdo ekip tjetër – por ne punuam shumë dhe puna e madhe shpërblehet”, deklaroi Lagumdzija, kampion tre herë i Ligës Evropiane.
Ndeshja u karakterizua nga dueli i ngushtë mes 26-vjeçarit Lagumdzija dhe 27-vjeçarit Michiel Ahyi nga Holanda, sidomos në dy setet e para. Por në setin e tretë, Lagumdzija shpërtheu me 9 pikë, duke i dhënë Turqisë epërsinë e nevojshme për të dominuar edhe në setin e katërt.
Në fillimin e setit të katërt, Lagumdzija dhe Efe Mandiraci realizuan një seri të fuqishme 4-0, e cila u zgjerua në 16-9, me gabime të njëpasnjëshme nga holandezët. Holanda tentoi një rikthim, i udhëhequr nga Tom Koops, që realizoi tri pikë në një seri 6-1, duke e ngushtuar diferencën në vetëm dy pikë (15-17). Por turqit reaguan me qetësi dhe mbyllën ndeshjen në mënyrë të sigurt, duke mbetur të pamposhtur në këtë kampionat ku marrin pjesë 32 vende.
“Kemi një momentum shumë të fortë tani. E dimë që do të jetë shumë e vështirë të arrijmë në gjysmëfinale, sepse jemi në një Kampionat Botëror”, tha Lagumdzija, boshnjaku i lindur në Sarajevë që luan për Kombëtaren Turke.
Efe Mandiraci kontribuoi me 15 pikë (11 sulme, 3 “ace” dhe 1 bllok), ndërsa Mirza Lagumdzija dhe Bedirhan Bülbül shtuan përkatësisht 13 dhe 12 pikë, duke e bërë Turqinë me katër lojtarë me shifra dyshifrore në pikë.
Turqia do të ketë tre ditë për përgatitje para se të përballet në çerekfinale me Polonisë (Nr. 1 në botë) të cilët mposhtën Kanadanë – të cilën turqit e mundën bindshëm në fazën e grupeve.
Ndërkohë, Holanda nuk arriti të kualifikohej në çerekfinale për të dytën herë radhazi. Michiel Ahyi ishte më i miri për holandezët me 21 pikë, ndërsa Tom Koops shtoi 14 pikë, 7 pritje dhe 6 marrje të suksesshme. Cornelis Luuc van DetEnt dhe Bennie Tuinstra regjistruan nga 9 pikë secili në këtë humbje.
Kjo paraqitje shënon një kthesë të rëndësishme për skuadrën turke, e cila në vitin 2022 ishte eliminuar në të njëjtën fazë nga Shtetet e Bashkuara. Këtë herë, e mbështetur fuqishëm nga publiku lokal, Turqia arrin në mesin e tetë më të mirëve – një arritje që vjen pas pesë pjesëmarrjesh që nga debutimi në vitin 1956.
“Që nga ndeshja e parë, kishim momentum. Ndryshimi është se më parë gjithmonë luanim kundër publikut. Sot, ata ishin me ne, sepse i kërkuam filipinasve të na mbështesin dhe duket se funksionoi,” tha Yenipazar, i cili mbetet i pamposhtur në katër ndeshje.
“Shpresojmë që në ndeshjen e radhës të kemi edhe më shumë mbështetje nga filipinasit. I ftojmë të vijnë dhe të na mbështesin sërish.”
Kapiteni turk, ndonëse emocional për faktin që bashkëshortja e tij, Maja, është polake, mbetet i përqendruar te objektivi i radhës: përballja çerekfinale me Polonininë.
“Ajo është polake dhe normalisht që kam emocione për të. Por jam plotësisht i përqendruar te puna ime. I respektojmë të gjithë – lojtarët dhe trajnerët e Polonisë,” tha ai. “Po përpiqem të ruaj qetësinë, sepse si një nga lojtarët më me përvojë në ekip, duhet t’i udhëheq dhe t’i mbaj të qetë shokët e skuadrës. Tani fokusi është vetëm te faza tjetër.”
