Turqia bën histori në Botërorin e Volejbollit, Polonia kalon Kanadanë dhe përplaset me turqit në çerekfinale

Turqia e udhëhequr nga kapiteni Murat Yenipazar, e mbështetur fuqishëm nga tifozët filipinas, arriti një fitore historike ndaj Holandës (3-1: 27-29, 25-23, 25-16, 25-19) duke siguruar për herë të parë çerekfinalet e Kampionatit Botëror të Volejbollit për meshkuj.

Adis Lagumdzija shkëlqeu me 28 pikë, ndërsa skuadra turke, e pamposhtur në katër ndeshje, tejkaloi pengesën që i kishte ndalur në fazën e 16-shes në vitin 2022. Tani, Turqia do të përballet me Poloninë, kampionen e botës së vitit 2014 dhe nënkampionen e vitit 2022, e cila mposhti bindshëm Kanadanë 3-1 (25-18, 23-25, 25-20, 25-14). Polakët, të udhëhequr nga Kamil Semeniuk me 18 pikë, treguan forcë dhe përvojë, duke synuar Final Four dhe revansh ndaj Italisë.

Çerekfinalja e madhe – Turqia dhe Polonia do të përballen të mërkurën në “SM Mall of Asia Arena” për një vend në katërshen më të mirë të botës.