Fer Volley fiton derbin ndaj Dritës dhe ruan kreun

Në njërën nga sfidat më të shumëpritura të javës së tetë në Raiffeisen Superligën A për femra, Fer Volley ka triumfuar ndaj Dritës me rezultatin 3:1 (25:23, 23:25, 25:22, 25:13), duke dëshmuar forcën e kampioneve në fuqi.

Ndeshja u karakterizua nga tre sete të parë tejet të luftuara, por në setin e katërt skuadra ferizajase dominoi qartësisht, duke siguruar një fitore me peshë që e mban në krye të tabelës.

Fitorja e parë për Gjinocin, përballje dramatike me Prishtinën 75

Një tjetër sfidë emocionuese u zhvillua në Gjinoc, ku vendaset arritën fitoren e tyre të parë sezonale pas një beteje dramatike ndaj Prishtinës 75. Ndeshja u mbyll me rezultatin 3:2 në sete (21:25, 25:14, 16:25, 26:24, 16:14), duke dhuruar një spektakël të vërtetë për të pranishmit.

Për Gjinocin, kjo ishte ndeshja e dytë radhazi që vendoset në setin e pestë, ndërsa për Prishtinën 75, humbja e pestë radhazi e lë skuadrën në krizë rezultatesh.