Humbja e tretë për Trepçën në FIBA Europe Cup, Anwil shënon fitoren e parë

Trepça ka pësuar humbjen e tretë radhazi në fazën e grupeve të FIBA Europe Cup, duke u mundur në shtëpi nga skuadra polake Anwil Włocławek me rezultat 87:97. Ndonëse mitrovicasit treguan momente të forta, sidomos në çerekun e fundit, kjo nuk mjaftoi për të shmangur një tjetër disfatë.

Takimi nisi me dominim të Anwilit, që fitoi çerekun e parë 32:23. Në periodën e dytë, Trepça reagoi dhe ngushtoi diferencën me një fitore 18:12, duke e çuar ndeshjen në pushim me rezultat të ngushtë. Megjithatë, çereku i tretë doli vendimtar për fatin e ndeshjes – Anwil riktheu kontrollin me rezultat 27:16 dhe krijoi një epërsi të re që e ruajti deri në fund, edhe pse Trepça u përpoq të rikthehej në çerekun e katërt (30:26).

Për skuadrën polake, kjo ishte fitorja e parë në grup pas dy humbjeve të ngushta në vazhdime, ndërsa Trepça mbetet pa pikë në tre ndeshjet e para, me shumë punë për të bërë në përpjekje për një kthesë të vështirë.

Në aspektin individual, më i dalluari për Anwilin ishte Michalak, i cili shënoi 21 pikë dhe shtoi 3 kërcime e 1 asistim. Te Trepça, më efikasët ishin Mustapha Amzil dhe Jaye Payne me nga 17 pikë secili – Amzil kontribuoi edhe me 5 kërcime dhe 1 asistim, ndërsa Payne shtoi 4 kërcime dhe 2 asistime. Altin Arslanagiq dha 8 pikë dhe 5 asistime, ndërsa Drilon Hajrizi realizoi po ashtu 8 pikë dhe 4 kërcime. Vlen të theksohet edhe performanca e David Kapitit, i cili shënoi 7 pikë në vetëm 8 minuta lojë.

Trepça do të ketë edhe tre ndeshje të tjera në fazën e grupeve, por për të mbajtur gjallë shpresat për kualifikim, do të nevojitet përmirësim i qartë në organizim dhe efikasitet – sidomos në mbrojtje, ku skuadra po lëshon shumë.