Italia ka treguar edhe një herë se është forca kryesore në volejbollin botëror për femra, duke mposhtur Poloninë me rezultat të pastër 3–0 në gjysmëfinalen e Volleyball Nations League 2025.
Ndeshja u zhvillua sot pasdite në “Atlas Arena” të Lodz-it në Poloni, ku italianet nuk lanë vend për surpriza: 25–18, 25–16 dhe 25–14 ishin rezultatet e seteve, që konfirmuan dominimin e tyre të plotë.
Kampionet në fuqi të këtij kompeticioni tani kanë arritur në finalen e madhe, pasi më herët kishin eliminuar edhe SHBA-në në çerekfinale me po të njëjtin rezultat 3–0. Italia ka regjistruar kështu 13 fitore radhazi në këtë edicion dhe 21 ndeshje pa humbje në total gjatë turneut.
Polonia, që e kishte befasuar Kinën në çerekfinale, nuk arriti të përballojë intensitetin dhe organizimin e skuadrës italiane. Për vendaset mbetet ndeshja për vendin e tretë, ndërsa Italia do të kërkojë titullin e saj të tretë në këtë turne.
Finalja pritet të jetë një përballje spektakolare, ku italianet do të kërkojnë të konfirmojnë edhe një herë statusin si kombëtarja më e suksesshme në këtë dekadë të VNL-së.
Brazilia dhe Japonia përballen në gjysmëfinale tjetër të zjarrtë
Gjysmëfinalja e dytë e Volleyball Nations League 2025 për femra sjell një përballje klasike mes dy gjigantëve të volejbollit botëror – Brazili dhe Japonia. Ndeshja zhvillohet në Atlas Arena të Lodz-it, Poloni, nga ora 20:00, dhe pritet të jetë një nga duelet më të nxehta të këtij edicioni.
Brazili arriti në këtë fazë pas një fitoreje të pastër 3–0 ndaj Gjermanisë në çerekfinale, duke treguar forcë të jashtëzakonshme në të gjitha segmentet e lojës. Përfaqësuesja “verdeamarela” synon rikthimin në majat e volejbollit, pas disa viteve pa trofe të mëdha.
Nga ana tjetër, Japonia e nisi me vështirësi çerekfinalen kundër Turqisë, por përmbysi gjithçka për të triumfuar 3–2 në një ndeshje dramatike. Ato kanë qenë finaliste në vitin 2024 dhe mbërrijnë në këtë fazë me ambicie të qarta për titull.
Në përballjet e fundit, Brazili ka pasur epërsi ndaj Japonisë – përfshirë fitore në fazën grupore të këtij viti dhe në Lojërat Olimpike 2024 – por skuadra aziatike mbetet e paparashikueshme dhe teknike, duke garantuar një sfidë të baraspeshuar.
Fituesja e kësaj ndeshjeje do të përballet në finalen e madhe me Italinë, e cila mposhti Poloninë 3–0 në gjysmëfinalen tjetër. Tifozët po presin me padurim këtë duel, që do të përcaktojë kush do të ketë mundësinë të ngrejë trofeun më të rëndësishëm të volejbollit për femra këtë vit.
