Sipas të dhënave nga Transfermarkt, të cituara nga AS, përcjellë Kërlaçki, kampionati spanjoll La Liga ka humbur rreth 160 milionë euro në vlerë tregu që nga përfundimi i sezonit të kaluar.
Kjo rënie e ndjeshme i atribuohet kryesisht largimit të disa prej lojtarëve më të rëndësishëm, që janë shitur nga klubet për të përmbushur kërkesat strikte financiare të vendosura nga autoritetet spanjolle.
Skuadra si Sevilla, Real Betis dhe Valencia kanë qenë të detyruara të shesin asetet më të vlefshme për të balancuar buxhetet e tyre përpara nisjes së sezonit të ri.
Ndërkohë, Real Madrid dhe Barcelona kanë ruajtur pjesën më të madhe të yjeve të tyre. Megjithatë, Barcelona vazhdon të përballet me vështirësi në regjistrimin e lojtarëve të rinj, ndërsa madrilenët kanë investuar pothuajse 180 milionë euro në përforcime të reja.
Goditjen më të madhe nga kjo rënie në vlerë tregu e kanë marrë ekipet e mesit dhe fundtabelës, të cilat shpesh janë detyruar të shesin talentet e tyre jashtë vendit për mbijetesë financiare, duke mos qenë në gjendje të afrojnë lojtarët që u nevojiten realisht.
Ky trend negativ mund të ndikojë në rënien e konkurrueshmërisë globale të La Ligës, sidomos në krahasim me Premier League apo Saudi Pro League, të cilat kanë vazhduar me ritëm të lartë shpenzimesh gjatë kësaj vere.
