Shqiponja përmbys Prishtinën në një ndeshje dramatike të Superligës së hendbollit

Një përballje tepër interesante është zhvilluar të enjten mbrëma në Gjakovë, ku skuadra vendase, Shqiponja, ka arritur fitore të rëndësishme ndaj Prishtinës me rezultat 37:34, në kuadër të xhiros së tetë të Superligës së Kosovës në hendboll (femra).

Prishtina e mbylli pjesën e parë në epërsi minimale, 19:18, dhe ndeshja vazhdoi me ritëm të lartë dhe baraspeshë deri në minutat e fundit. Në minutën e 58-të, Eduarta Kurteshi shënoi për mysafiret duke rikthyer epërsinë në 35:34, por reagimi i Shqiponjës ishte i shpejtë dhe vendimtar. Ana Gonçalves dhe Alma Nivokazi realizuan tre gola të njëpasnjëshëm, duke vulosur fitoren e vendasve.

Te Shqiponja, më efikasja ishte Ana Carolini Gonçalves me 12 gola, e ndihmuar nga Juleidt Lourençao me tetë, Alma Nivokazi me gjashtë dhe Aurora Lokaj me pesë.

Nga ana tjetër, Prishtina u udhëhoq nga Celine Tolno Sia me 12 gola, ndërsa Burneta Rama realizoi shtatë dhe Eduarta Kurteshi pesë.

Pas kësaj fitoreje, Shqiponja renditet në vendin e dytë me 12 pikë nga tetë ndeshje, ndërsa Prishtina qëndron në pozitën e pestë me 6 pikë nga shtatë takime të zhvilluara.