Ylli i Finlandës dhe i Utah Jazz, Lauri Markkanen, ka bërë një paraqitje mbresëlënëse në EuroBasket 2025, duke udhëhequr ekipin e tij me mesatare prej 24.7 pikësh për ndeshje. Në një intervistë për platformën Drafteados, përcjellë Kërlaçki, Markkanen ndau disa mendime interesante mbi dallimet mes basketbollit në NBA dhe atij në Evropë, duke vënë në pah se në disa aspekte, loja në sistemin FIBA mund të jetë më e vështirë.
“NBA ka lojtarët më të mirë në botë në çdo skuadër dhe ndeshjet janë më të gjata, kështu që ke më shumë kohë për të shënuar pikë dhe për të bërë gjëra të tjera,” tha Markkanen. “Por ka edhe rregulla që e bëjnë shënimin më të lehtë në NBA, si për shembull rregulli i tre sekondave në mbrojtje dhe ndalimi i prekjes së topit mbi rrathë — një gjë që këtu më nervozon.”
Sipas tij, loja në Evropë kërkon më shumë përqendrim dhe vjen me sfida taktike dhe fizike të ndryshme: “Mendoj se në disa mënyra FIBA është vërtet më e vështirë.”
Markkanen theksoi gjithashtu rëndësinë e angazhimit me ekipin kombëtar për përgatitjen e sezonit të NBA-së. Ai tha se pjesëmarrja në EuroBasket e ndihmon të mbajë formën fizike dhe të ruajë nivelin e lartë konkurrues gjatë gjithë verës: “Je mendërisht në zonën e lojës elitare dhe kjo të jep përparësi kur fillon kampi stërvitor i NBA-së.”
Në sezonin e fundit me Utah Jazz, Markkanen regjistroi mesatare prej 19.0 pikësh, 5.9 kërcimesh dhe 1.5 asistimesh për ndeshje, duke luajtur në 47 takime. Ekipi i tij përfundoi sezonin me vetëm 17 fitore në 65 ndeshje, një prej bilanceve më të dobëta në ligë.
