Kek: Ashtu siç përmirësuam mbrojtjen, tani do të rregullojmë edhe sulmin
Përpara kombëtares së Sllovenisë janë dy ndeshjet e fundit të kualifikimeve për Kupën e Botës kundër Kosovës në shtëpi dhe Suedisë në transfertë. Përzgjedhësi Matjazh Kek publikoi listën e lojtarëve, ku nuk ka ndryshime të mëdha. Jan Mlakar dhe Andrazh Shporar rikthehen në skuadër.
Besim, përkushtim dhe synimi drejt Botërorit
Selektori i Sllovenisë, Matjazh Kek, i cili pas katër muajsh ka kaluar problemet me dhimbjet e shpinës, është i vendosur, plot vetëbesim dhe në humor të mirë përpara fundit të kualifikimeve për Botërorin në Amerikën e Veriut. Ai tha:
“Ndeshjet me Kosovën dhe Suedinë do të tregojnë nëse jemi mjaftueshëm cilësorë dhe të aftë për të merituar kualifikimin. Fillimisht përqendrohemi te Kosova, një përfaqësuese që për disa mund të jetë surprizë, por jo për mua – unë e dija që ka cilësi. Me një rezultat pozitiv do të kemi mundësi që të vendosim vetë për fatin tonë në xhiron e fundit.”
Përzgjedhja e skuadrës dhe gjendja fizike
“Disave u mungojnë minutat. Gnezda Çerin nuk do të luajë ndaj Kosovës për shkak të kartonëve të verdhë. Vipotnik mungoi në ndeshjen e fundit të Swanseas, por ekzaminimet treguan se nuk është asgjë serioze. Lovriç dhe Seshlar janë më shumë rezervistë në klubet e tyre. Mosaktivizimi në klub mund të jetë motiv shtesë për ta dhënë maksimumin në kombëtare.”
Sulmi, shqetësimi kryesor
“Mesazhi kryesor për djemtë do të jetë vendosmëria, vetëbesimi dhe bindja që mund të luajmë ndaj kujtdo. E kemi dëshmuar këtë. Na duhet një finalizim më i mirë i rasteve – ky është shqetësimi im kryesor. Mbrojtja ka qenë perfekte në tetor, por tani duhet të korrigjojmë sulmin.”
Rikthimi i Shporarit dhe rëndësia e eksperiencës
“Na presin dy ndeshje ku, përveç lojës dhe cilësisë, do të jenë të rëndësishme edhe përvoja dhe gjendja mendore. Jam i lumtur që Shporar është rikthyer me gola pas lëndimit. Klubi i tij e menaxhon minutazhin e tij, që do të thotë se ende nuk është në formën më të mirë. Megjithatë, kemi nevojë për të – do të fokusohemi më shumë në aspektin ofensiv.”
Për minutat e Bijol te Leeds
“Minutat e fundit të Bijol në Premier League janë shumë të rëndësishme. Ai është shembull se si mund të japësh kontribut për kombëtaren edhe me pak minuta në klub. Shpresoj që humbja e fundit e Leeds të mos ndikojë në statusin e tij.”
Ndjekja e lojtarëve dhe analiza e ciklit të fundit
“Ne si staf e ndjekim çdo minutë të lojtarëve tanë. Kur Janža zëvendësohet në minutën e 87-të, menjëherë kërkojmë informacione. Kjo është pjesë e punës sonë.”
“Lojërat me Kosovën dhe Zvicrën në tetor treguan përmirësim të madh në mbrojtje – nuk lejuam thuajse asnjë rast. Por na mungoi finalizimi. Sidomos ndaj Kosovës, ku krijuam më shumë se çdo skuadër tjetër ndaj tyre. Tani gjithçka është nënshtruar rezultatit pozitiv.”
Tifozeria në Stozhice
“Ne nuk mund të ndikojmë te përbërja e tribunave. Kjo gjeneratë ka luajtur edhe nën dominimin e tifozëve kundërshtarë, si ndaj Serbisë dhe Bosnjës. Me rëndësi është që gjithçka të ndodhë në atmosferë sportive. Stadiumi është i shitur – shpresoj që t’i nxisim tifozët tanë të jenë më të zëshëm.”
Mesazhi për skuadrën në grumbullim
“Përpara grumbullimit në Brdo të hënën, do t’u përsëris djemve rëndësinë e vetëbesimit dhe vendosmërisë. Dy ndeshjet e fundit pa gola na detyrojnë të reagojmë njësoj si pas dy ndeshjeve të para kur pësuam pesë gola.”
Për spekulimet e një marrëveshjeje mes Kosovës dhe Zvicrës në xhiron e fundit
“Është e vështirë të përgjigjem për diçka që nuk mund ta kontrollojmë. Do të përqendrohemi vetëm te ndeshja me Kosovën. Çfarë ndodh më pas, do ta shohim.”
Për mundësinë që Franko Kovaçeviç të luante për Slloveninë
“E njoh që nga koha kur ishte te unë në Rijekë. Jam i lumtur që është shpërblyer me ftesë nga Kroacia. Nuk e kam menduar asnjëherë që ai të luante për Slloveninë – për ne janë më të rëndësishëm Sheshko, Vipotnik, Mlakar dhe të tjerët.”
Lista e plotë e lojtarëve të ftuar nga Matjazh Kek:
-
Portierë: Jan Oblak (Atletico Madrid), Vekiç (Vejle), Luk Leban (Celje)
-
Mbrojtës: Bijol (Leeds), Balkovec (Fatih Karagümrük), Karniçnik (Celje), Janzha (Gornik Zabrze), Brekalo (Orlando City), Drkushiç (Zenit), Zec (Holstein Kiel)
-
Mesfushorë: Stojanoviç (Legia Varshavë), Gnezda Çerin (Panathinaikos), Lovriç (Udinese), Gorenc Stankoviç, Horvat (të dy nga Sturm Graz), Elshnik (Crvena Zvezda), Petroviç (Rijeka), Svetlin (Korona Kielce), Seshlar (Eyupspor)
-
Sulmues: Sheshko (Manchester United), Vipotnik (Swansea), Mlakar (Amiens), Shturm (Celje), Nejc Gradishar (Al Ahly), Shporar (Slovan Bratislava)
Përkthyer nga Dnevnik.
