Jonathan Rowe dhe Adrien Rabiot janë përjashtuar përkohësisht nga skuadra e parë e Olympique de Marseille, pas një përplasjeje të ashpër në dhomat e zhveshjes që pasoi humbjen 1:0 ndaj Rennes të premten mbrëma, raportojnë burime të RMC Sport.
Sipas të përditshmes lokale La Provence, incidenti ndodhi rreth orës 23:00 dhe përfshiu një konfrontim fizik mes dy lojtarëve. Fituesi i Euro U21, Rowe, dyshohet se ka goditur me shuplakë Adrien Rabiot, pas një shkëmbimi fjalësh në lidhje me paraqitjen e tij në ndeshje. Gazetarët që ndodheshin pranë zonës së intervistave raportuan se dëgjuan britma që vinin nga zhveshtorja e ekipit.
Situata ka degraduar në një përplasje fizike, përpara se të ndërhynin trajneri Roberto De Zerbi, stafi teknik dhe drejtori sportiv Mehdi Benatia për të qetësuar tensionet.
Marseille e nisi sezonin 2025/26 me një humbje zhgënjyese ndaj Stade Rennais, pavarësisht dominimit në posedim dhe avantazhit numerik në fushë. Goli i vetëm i takimit u shënua nga Ludovic Blas në minutat shtesë të ndeshjes.
Klubi ende nuk ka dhënë një afat për kohëzgjatjen e përjashtimit të dy lojtarëve, ndërsa “Les Phocéens” do të përballen të shtunën e ardhshme me Paris FC në “Stade Vélodrome”.
